Qazaqstanda úsh aıda 1,37 mıllıon TikTok vıdeosy joıyldy

ASTANA. KAZINFORM — TikTok platformasy 2026 jyldyń ekinshi toqsanynda Qazaqstanda Qaýymdastyq erejelerin buzǵan 1,37 mıllıonnan astam beınerolıkti joıdy. Olardyń 99,6 paıyzy paıdalanýshylar shaǵym túsirmeı turyp anyqtalyp, óshirilgen. Bul týraly kompanııanyń Qaýymdastyq erejeleriniń saqtalýy jónindegi esebinde aıtylǵan.

TikTok
Foto: Euronews

Esepte bıyl sáýir men maýsym aralyǵynda platformanyń qaýipsizdikti qamtamasyz etý baǵytynda atqarǵan jumystary qamtylǵan. Derekke súıensek, Qazaqstanda ereje buzǵan beınerolıkterdiń 92,1 paıyzy jarııalanǵannan keıingi alǵashqy 24 saǵat ishinde joıylǵan.

Al álem boıynsha osy kezeńde TikTok 188 mıllıonnan astam beınerolıkti óshirgen. Olardyń 99,5 paıyzy paıdalanýshylardan shaǵym túspeı turyp anyqtalǵan. Kompanııa bul kórsetkishti platforma tarıhyndaǵy eń joǵary nátıje dep atap otyr. Ereje buzǵan kontenttiń 92,7 paıyzy jarııalanǵannan keıingi alǵashqy táýlikte joıylǵan.

Moderatsııa jumysynda jasandy ıntellekt pen avtomattandyrylǵan júıelerdiń úlesi artyp keledi. Esep boıynsha, álemde ereje buzǵan beınerolıkterdiń 97,4 paıyzy avtomattandyrylǵan quraldardyń kómegimen anyqtalyp, joıylǵan. Bul da platforma iske qosylǵaly bergi eń joǵary kórsetkish.

Sonymen qatar kontentti tekserýge qaýipsizdik mamandary da qatysady. Olar kúrdeli ári daýly jaǵdaılardy, sonyń ishinde paıdalanýshylar shaǵymdanǵan materıaldardy qaraıdy. Ereje buzýshylyq rastalǵan jaǵdaıda, akkaýnt ıesine tıisti habarlama jiberiledi.

Platforma jalǵan akkaýnttar men qoldan jasalǵan belsendilikke qarsy sharalardy da kúsheıtken. 2026 jyldyń ekinshi toqsanynda álem boıynsha 352 mıllıonnan astam jalǵan akkaýnttyń ashylýyna jol berilmegen. Budan bólek, jasandy túrde kóbeıtilgen 6,2 mıllıardtan astam laık, 2,7 mıllıard jalǵan jazylýshy jáne jalǵan akkaýnttar jarııalaǵan 190 mıllıon pikir joıylǵan.

Sondaı-aq jazylýshylar sanyn qoldan kóbeıtýge baǵyttalǵan 7,5 mıllıardtan astam árekettiń joly kesilgen.

Aıta keteıik, TikTok Qaýymdastyq erejeleriniń saqtalýy týraly esepti turaqty túrde jarııalap otyrady. Kompanııa muny platformanyń ashyqtyǵyn qamtamasyz etý jáne paıdalanýshylardyń qaýipsiz tsıfrlyq ortada kontent jasap, ózara baılanysýyna jaǵdaı jasaý baǵytyndaǵy jumystyń bir bóligi retinde túsindiredi.

Buǵan deıin bıyl 10 aıda ınternet keńistiginde balaǵat sózder men balalarǵa zııandy aqparattardyń 592 faktisi anyqtalǵany týraly jazǵan edik.