Qazaqstanda úsh áýe kompanııasyna aıyppul salyndy
ASTANA. KAZINFORM – Kólik mınıstrliginiń avıatsııa ákimshiligi júrgizgen tekserýlerdiń nátıjesinde 3 áýe kompanııasy men 4 ushqysh ákimshilik jaýapqa tartyldy.
Búginde elimizdiń avıatsııa ákimshiligi Kólik mınıstriniń tapsyrmasyna sáıkes An-2 ushaqtaryn tekserýge qatysty jeńil jáne asa jeńil azamattyq áýe kemelerin paıdalanýshylardy jospardan tys tekserip jatyr.
Tekserý qorytyndysyna sáıkes áýe kemelerin paıdalaný kezinde azamattyq avıatsııa salasyndaǵy normatıvtik quqyqtyq aktilerdiń kelesi talaptary buzylǵan:
— komandır áýe kýáliginsiz ushqan (4 fakti tirkeldi) jáne ol týraly áýe qozǵalysy qyzmet kórsetý organyna habarlamaǵan;
— ushý qujattamasynyń bolmaýy;
— áýe kemesiniń tehnıkalyq qyzmet kórsetý qujatyn ortalyqqa jibermegen.
Vedomstvo taratqan aqparatta, áýe kompanııalaryna qatysty jospardan tys tekserý jumystary jalǵasyp jatqany aıtylǵan. Tamyz aıynda 6 áýe qyzmeti tekseristen ótedi, al shildede 10 áýe kompanııasyn iriktep tekserý júrdi.
«Qazaqstannyń avıatsııa ákimshiligi júrgizgen tekserýlerdiń nátıjesinde shaǵyn avıatsııaǵa jatatyn 3 áýe kompanııasy men 4 ushqyshqa QR Azamattyq avıatsııa salasyndaǵy normatıvtik quqyqtyq aktilerdi buzǵany úshin 11 aıyppul saldy», - delingen habarlamada.
Aıta keteıik, Air Astana kompanııasy 5 tamyz kúni Astana áýejaıynyń operatory FlyArystan ushaqtarynyń birinen aqaý shyǵyp, saldarynan ushaqtyń birneshe kún boıy májbúrli turaqqa qoıylǵanyn habarlady. Áýejaı baspaldaqtaryn durys qoldanbaýdyń saldarynan ushaqtyń artqy kireberis esigi zaqymdanǵany belgili boldy.
Keıin sońǵy ýaqytta áýe kemelerine keltirilgen zalal oqıǵalarynyń jıi bolýyna baılanysty elordalyq áýejaıda jospardan tys tekserý júretini habarlandy.
