Qazaqstanda usaq energotaratýshy uıymdar biriktirilýi yqtımal

ASTANA. QazAqparat - Qazaqstanda usaq energotaratýshy uıymdardy biriktirý qajettiligi týyndaýda. Mundaı usynysty búgin Parlament Májilisinde "Energetıka máseleleri týraly" zań jobasyn talqylaýǵa arnalǵan dóńgelek ústelde QR Energetıka mınıstrligi atomdyq jáne energetıkalyq qadaǵalaý men baqylaý komıtetiniń tóraǵasy Suńǵat Esimxanov jarııa etti, dep xabarlaıdy QazAqparat.

Onyń sózinshe, búginde Qazaqstanda elektr energııasyn taratatyn usaq uıymdar jeterlik.

"Mysaly, Qaraǵandy oblysy, Jezqazǵan aýmaǵynda osyndaı uıymdar óte kóp. 1-10 shaqyrymǵa deıingi bir-birimen jalǵasqan úsh, tórt, bes uıymnan quralǵan tizbekter bar. Olardyń árqaısysynda óz tarıfteri bar", - dedi S. Esimxanov.

Komıtet tóraǵasynyń atap ótkenindeı, bul uıymdardy biriktirý máselesi kóterilýde.

"Eger biz olardy biriktire alsaq, elektr jelileriniń sapasy boıynsha, qamsyzdandyrý boıynsha bizge úlken kómek bolar edi. Sondyqtan Elbasynyń "100 naqty qadamynyń" 51-qadamynda atalmysh aýmaqtyq uıymdardy nyǵaıtý jóninde aıtylǵan", - dep túıdi sózi S. Esimxanov.