Qazaqstanda USAID klımattyń ózgerýin bir qalypta ustaý jónindegi baǵdarlamanyń tanystyrylymy boldy
ASTANA. 23 qańtar. QazAqparat - Klımattyń ózgerýi problemasy - jahandyq másele jáne ony sheshý úshin keshendi sharalar qoldaný kerek.
Klımattyń ózgerýin bir qalypta ustaý jónindegi qazaqstandyq baǵdarlama osyndaı sharalardyń biri dep aıtýǵa bolady.
Bul týraly búgin Astana qalasynda QR Qorshaǵan orta jáne sý resýrstary mınıstrligi men Amerıkalyq Halyqaralyq damý jónindegi agenttiginiń (USAID) klımattyń ózgerýin bir qalypta ustaý jónindegi qazaqstandyq baǵdarlamasynyń tusaýkeserinde Tómen kómirtektik damý departamentiniń dırektory Gúlmıra Serǵazına aıtty.
«Klımattyń ózgerýin bir qalypta ustaý jónindegi baǵdarlama Qazaqstan Respýblıkasy Úkimetiniń tómen kómirtektik damý jáne «jasyl» ekonomıkaǵa kóshý maqsattaryn júzege asyrý boıynsha júrgizip jatqan is-sharalaryn qoldaýǵa baǵyttalǵan», - dedi G. Serǵazına.
Onyń aıtýynsha, Baǵdarlama aıasynda úsh negizgi mindet oryndalmaq.
Birinshiden, Qazaqstan Respýblıkasy Úkimetiniń parnıktik gazdardy (PG) tómendetýge baǵyttalǵan saıasaty men sharalaryn iske asyrý jáne qamtamasyz etý jónindegi múmkindikterin keńeıtý. Qazaqstanda PG shyǵaryndylaryna kvotalardy satý júıesin damytý men iske asyrý sharalaryn qoldaý. Qurylyp jatqan saýda júıesin retteıtin quraldar men rásimderdi daıyndaý. Baǵdarlama retteýshi organdar men retteý júıesi qamtıtyn kásiporyndardyń arasynda nátıjeli dıalog qurýǵa kómektesedi;
Ekinshiden, bıznes ókilderiniń PG kólemderin ólsheý, esep berý jáne verıfıkatsııalaý (anyqtap tekserý) boıynsha korporatıvtik basqarýyn jaqsartý arqyly PG shyǵarylymdaryn azaıtý men ónimdiligin arttyrý isindegi áleýetin qalyptastyrý. Baǵdarlama bıznes-qurylymdarǵa energııa únemdeý jáne PG shyǵarylymdaryn azaıtý sharalaryn damytyp oryndaýǵa, sondaı-aq, verıfıkatorlar men aýdıt ótkizetin uıymdardyń áleýetin kúsheıtýge kómektesedi;
Úshinshiden, qazaqstandyq mamandardyń energııany únemdeý jáne klımattyń ózgerýi salalaryndaǵy kásibı bilimderin oqytý semınarlaryn ótkizý jáne kásibı oqý ortalyqtaryna oqytý baǵdarlamalaryn berýdiń kómegimen joǵarylatý.
