Qazaqstanda urlanǵan uıaly telefon buǵattalatyn bolady

ASTANA. QazAqparat - Sáýirde Bas prokýratýranyń bastamasy boıynsha Іshki ister mınıstrligi aýmaqtyq bólimsheleri men uıaly baılanys operatorlarynyń urlanǵan uıaly abonenttik quraldardy buǵattaý jónindegi ózara is-qımyly týraly Memorandýmǵa qol qoıyldy, dep habarlady QR Bas prokýratýrasy Quqyqtyq statıstıka jáne arnaıy esepke alý komıtetiniń baspasóz qyzmeti.

Atalǵan qujatty ázirleýge jáne qabyldaýǵa uıaly telefondardyń urlanýyna baılanysty qalyptasqan ahýal negiz boldy. Jyl saıyn Qazaqstanda 60 myńǵa jýyq uıaly baılanys quraly urlanady, olardyń ishinen ishki ister organdary ortasha shamamen 2,5 myńyn anyqtap, zańdy ıelerine qaıtara alady.

Oǵan qosa «Baılanys týraly» Zańǵa, sondaı-aq Uıaly baılanys qyzmetin kórsetý qaǵıdalaryna sáıkes, abonenttik quraldardyń jumysyn ІMEІ-kody boıynsha toqtatýdy uıaly baılanys operatorlary abonent tıisti ótinishpen júgingen jaǵdaıda ǵana iske asyrady.

«Alaıda, kóbinese bulaı bolmaıdy, kóptegen adamdar bul mehanızm jaıly bilmeıdi, al basqalary ýaqyttyń joqtyǵynan nemese ózge de sebepter boıynsha ótinish bergisi kelmeıdi», - dep atap ótedi qadaǵalaý vedomstvosy.

Endigi ýaqytta, qol jetkizilgen kelisim boıynsha, ishki ister organdary uıaly quraldary joǵalǵan jábirlenýshilerge uıaly baılanys operatorlarynyń mekenjaıyna uıaly telefonnyń jumysyn ІMEІ-kody arqyly toqtatý - buǵattaý týraly ótinishpen júginýleri qajettigin túsindirýi qajet.

Uıaly baılanys quraldarynyń jumysyn ІMEІ-kody boıynsha toqtatý praktıkasyn keńinen qoldaný úshin, ishki ister organdary arqyly uıaly baılanys operatorlarynyń mekenjaıyna ótinishpen júginý qajet, dep naqtylady QR Bas prokýratýrasy.