DSM: Únemdelgen 70,5 mlrd teńge halyqty tegin dári-dármekpen qamtýǵa baǵyttaldy
ASTANA. KAZINFORM - Qazaqstan Respýblıkasy Densaýlyq saqtaý mınıstrligi satyp alý júıesin reformalaýdyń nátıjesinde únemdelgen 70,5 mlrd teńgeni azamattardy qosymshadárilik qamtamasyz etýge baǵyttady.
Bosatylǵan qarajat onkologııalyq, júrek-qantamyr jáne aýtoımmýndyq aýrýlardy emdeýge arnalǵan 7 ınnovatsııalyq preparatty tegin dáriler tizibesine engizýge múmkindik berdi.
2025 jyldyń qorytyndysy boıynsha aýqymdy únemdeýge óndirýshi zaýyttarmen tikeleı kelisimsharttarǵa kóshý jáne BUU-nyń halyqaralyq uıymdary arqyly satyp alýdy keńeıtýdiń esebinen qol jetkizildi.
Sonymen qatar mınıstrlik tegin dárilik zattardyń tizbesin ońtaılandyryp, ómir súrý uzaqtyǵyna áser etpeıtin 90 tıimsiz pozıtsııa men nozologııany alyp tastady. Bosatylǵan lımıtter dıspanserlik esepte turǵan patsıentterdiń derbestendirilgen qajettilikterine baǵyttaldy.
Oń dınamıka 2026 jyly da saqtaldy, saýda rásimderin tsıfrlandyrýdyń esebinen 47 mlrd teńge únemdeldi.
Dárilik qaýipsizdikti nyǵaıtý maqsatynda 2026–2027 jyldary «SQ-Farmatsııa» biryńǵaı dıstrıbıýtorynyń jeke qoımalar jelisin salý josparlanp otyr. Jeke operatorlardyń qyzmetinen bas tartý bıýdjette jyl saıyn shamamen 1,7 mlrd teńgeni qosymsha únemdeýge múmkindik beredi.
Vedomstvo sapaly ımporttyq preparattardyń naryǵyna qoljetimdilikti de jeńildetip otyr. 2026 jyly jedeldetilgen tirkeý rásimi qoldanylatyn elder tizimine (AQSh, EO, Japonııa, Ulybrıtanııa) Túrkııa men Ońtústik Koreıa qosylady. Bul rette sapa baqylaýy kúsheıtilgen rejımde saqtalady: ótken jyly saraptama barysynda 112 preparattyń standarttarǵa sáıkes kelmeıtini anyqtalyp, janama áserlerine baılanysty 30 tirkeý kýáliginiń qoldanysy toqtatyldy.
Reformanyń mańyzdy kezeńderiniń biri — dárilikzattardy tsıfrlyq tańbalaýdy engizý boldy. Bul dári-dármek aınalymyn «kóleńkeli» sektordan shyǵarýǵa múmkindik berdi.
Nátıjesinde bólshek saýdadan túsetin salyq túsimderi 24%-ǵa (qosymsha 24 mlrd teńge) artty jáne dárihanalarda tegin beriletin 15 myń qaptamanyń qaıta satylýynyń joly kesildi.
Bıyl bıologııalyq belsendi qospalardy (BBQ) mindetti tańbalaýdy engizý, al 2027 jyldan bastap medıtsınalyq buıymdardy tańbalaý josparlanyp otyr.
Dári-dármek berý protsesi «Áleýmettik ámııan» servısiniń arqasynda barynsha ashyq bola tústi.
Elektrondyq retseptter taǵaıyndaýlardyń shamamen 90%-yn qamtyp, patsıentterge qyzmet kórsetý ýaqytyn eki esege qysqartty.
Keri baılanys úshin táýlik boıy jumys isteıtin «1439» baılanys ortalyǵy iske qosyldy, onda ótinishterdi jedel óńdeý úshin jasandy ıntellekt elementterin engizý josparlanyp otyr.
Osyǵan deıin Densaýlyq saqtaý mınıstrliginiń aldaǵy eki jylda 17 óńirde 49 jańa beıindik bólimshe ashatyny týraly jazdyq.