Qazaqstanda ýran qory 60 jylǵa jetedi — agenttik

ASTANA. KAZINFORM — Qazaqstandaǵy ýran qory 60 jylǵa jetedi. Bul týraly Atom energııasy jónindegi agenttigi tóraǵasynyń orynbasary Ǵumar Serǵazın málim etti. 

— Ýákiletti organnnyń resmı aqparatyna súıensek, elimizde 1 mln tonnaǵa jýyq tabıǵı ýran qory bar… Bizdegi ýran qory 60 jyldan astam ýaqytqa jetedi. Sonymen qatar, elimizde barlaý júrgizilmegen jerler de bar, onda da eleýli qor jınaqtalǵan, — dedi Ǵumar Serǵazın Senatta tilshiler suraǵyna jaýap bere otyryp.

Onyń aıtýynsha, qazir Fınlıandııada salynyp jatqan eki atom elektr stantsııasyna ýran jetkizý jóninde kelissózder júrip jatyr.

Eske salsaq, bıyl qazan aıynda Fınlıandııa prezıdentiniń Qazaqstanǵa resmı sapary barysynda 15 qujatqa qol qoıyldy.

Atom energetıkasy jónindegi agenttik tóraǵasy Almasadam Sátqalıev Qazaqstan ýranyn Fınlıandııa atom stansalaryna jetkizý múmkindigi týraly aıtty.

Bıyl Halyqaralyq atom energııasy jónindegi agenttik «Qyzyl kitap» baıandamasyn jarııalady. Sarapshylar qorytyndylaı kele, jer betinde buǵan deıin anyqtalǵan ýran qorlary 2080 jylǵa qaraı sarqylatynyn eskertken.