Qazaqstanda úndi shtamynyń anyqtalýy: Avıareıster jabylýy múmkin be
NUR-SULTAN. QazAqparat – QR Premer-Mınıstriniń orynbasary Eraly Toǵjanov «Koronavırýstyń úndi shtamyna baılanysty áýe reısteri jabylýy múmkin be?» degen suraqqa jaýap berdi, dep habarlaıdy QazAqparat tilshisi.
«Biz eshkimmen áýe korıdoryn jappaımyz. Bizde 150-ge jýyq reıs bar, 14 elmen tyǵyz baılanys ornatylǵan. Ózderińiz bilesizder, biz baıaǵyda-aq qaýipsizdik sharalaryn qabyldaǵanbyz: Qazaqstanǵa keletin barlyq azamattarǵa PTR-test mindettelgen. Bul tipti shetelde júrgen azamattarǵa da qatysty. Áýe keńistigin shekteý áli josparlanyp otyrǵan joq», - dedi spıker Ortalyq kommýnıkatsııalar qyzmetinde tilshi suraǵyna oraı.
Buǵan deıin Eraly Toǵjanov «Qazaqstanda úndi shtamyna baılanysty lokdaýn jarııalanýy múmkin be?» degen saýalǵa jaýap bergen edi.
«Búgingi kúni respýblıka aýmaǵyna lokdaýn engizýge baılanysty esh másele kórip otyrǵan joqpyz. Ol kún tártibinde de joq. Keshe vedomstvoaralyq komıssııa otyrysynda Nur-Sultan qalasynda naqty shekteý sharalaryn qabyldadyq. Sóz joq, onyń bárin aldyn alý sharalary dep aıtýǵa tolyq múmkindik bar. Onyń ishinde naqty obektiler men qyzmet kórsetý salasyna, halyq kóp jınalatyn saýda ortalyqtaryna baılanysty qandaı sharalar qolǵa alynǵanyn ózderińiz estidińizder. Sondyqtan qazir osy sharalar aınalasynda jumys isteı beremiz. Ári qaraıǵy sheshim qabyldaýymyz eldegi epıdemıologııalyq jaǵdaıǵa baılanysty bolady», - dep jaýap berdi Eraly Toǵjanov.
Aıta keteıik, 22 maýsymda elordada koronavırýstyń úndi shtamy anyqtaldy. Koronavırýstyń «Delta» shtamynyń juǵý qaýpi joǵary jáne osy shtamm anyqtalǵan naýqastardyń 60 paıyzynda 7 kúnge deıingi barynsha qysqa ınkýbatsııalyq kezeń baıqalǵan.
