Qazaqstanda un, maı, makaron, qant óndirisi artyp keledi

ASTANA. QazAqparat – Aýyl sharýashylyǵy mınıstri Erbol Qarashókeev 2022-2024 jyldarǵa arnalǵan azyq-túlik qaýipsizdigin qamtamasyz etý jospary týraly baıandady, dep habarlaıdy QazAqparat tilshisi.

Atalǵan josparda 31 is-shara kózdelgen, onyń 17-si ónim óndirý kólemin ulǵaıtý, agrarlyq ǵylymdy damytý jáne taýarlardy saqtaý, 7-si – azyq-túlik taýarlarynyń baǵasyn turaqtandyrý, 7-si – azyq-túlik taýarlarynyń qaýipsizdigi men sapasy boıynsha júrgiziledi. 31 sharanyń 11-i 2022 jyly oryndaldy jáne 20 shara 2023-2024 jyldarǵa josparlanǵan.

«Jalpy 2022 jyl qorytyndysy boıynsha azyq-túlik óndirisi kólemi 3,9% artyp, 2,9 trln teńgeni qurady. Bul rette azyq-túliktiń negizgi túrlerin: ósimdik maıy, un, makaron ónimderi, jarma, shujyq ónimderi men qantty óndirýde ósim baıqalady.

Kerisinshe, óndiris tómendegen birqatar ónimder bar jáne olar negizinen sút ónimderi: sary maı, sút, irimshik jáne súzbe, ashytylǵan sút ónimderi», - dedi E. Qarashókeev Úkimettiń búgingi otyrysynda.

Menshikti óndiris esebinen qamtamasyz etý 2022 jyly shujyq ónimderi boıynsha 56,4%-dan 61%-ǵa deıin, alma boıynsha – 73,7%-dan 75,6%-ǵa deıin, qus eti boıynsha – 65,4%-dan 68%-ǵa deıin, qant boıynsha – 42,6%-dan 51%-ǵa deıin ulǵaıdy. Bul rette irimshikter men súzbe boıynsha 56%-dan 53%-ǵa deıin tómendeý baıqalady.

«Osylaısha, sút ónimderi boıynsha taǵy tómendeý tirkelip otyr. Bul qazirgi ýaqytta sút ónimderin óndirý problemasy baryn rastaıdy, ol shıkizat bazasynyń damymaýymen baılanysty», - dedi Aýyl sharýashylyǵy mınıstri.