Qazaqstanda ulttyq valıýtadaǵy depozıtter arta bastady

NUR-SULTAN. QazAqparat – Qazaqstanda depozıttik salymdardyń kólemi 18,8 trln teńgeni quraıdy. Bul týraly búgingi Úkimet otyrysynda Ulttyq bank tóraǵasy Erbolat Dosaev málim etti, dep habarlaıdy QazAqparat tilshisi.

«Salymdardyń kólemi qazan aıynyń sońynda 18,8 trln teńgege jetip, jyl basynan beri 1,2 paıyzǵa ulǵaıdy. Shetel valıýtasyndaǵy salymdardy teńgelik depozıtterge aýystyrý jalǵasyp keledi. 10 aıda ulttyq valıýtadaǵy salymdar 8,5 paıyzǵa artty. Valıýtalyq depozıtter 6,5 paıyzǵa tómendedi. Nátıjesinde, depozıtterdiń dollarlaný deńgeıi jyl basyndaǵy 48,4 paıyzdan qazannyń qorytyndysy boıynsha 44,7 paıyzǵa deıin tómendedi», - dedi Erbolat Dosaev.

Ulttyq bank tóraǵasynyń aıtýynsha, jyl basynan beri jalpy kredıttik portfel qazannyń sońynda 3,1 paıyzǵa, ıaǵnı 13,5 trln teńgege deıin ósken.

«Uzaq merzimdi kredıtter portfeli 10 aıda 3,9 paıyzǵa - 11,5 trln teńgege deıin ulǵaıdy. Jańa kredıtter berý kólemi on aıda 2018 jyldyń osyndaı kezeńimen salystyrǵanda 13,2 paıyzǵa ulǵaıdy», - dedi ol.