Qazaqstanda Ulttyq medıtsınalyq tehnıkalardyń derekter bazasy qurylady
«Qazaqstan Respýblıkasynyń densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasy aıasynda Qazaqstan Respýblıkasy Densaýlyq saqtaý mınıstrligi «QazMedTeh» AQ, «Dárilik zattardy, medıtsınalyq buıymdardy jáne medıtsınalyq tehnıkany saraptaý Ulttyq ortalyǵy» ShJQ RMK jáne «Densaýlyq saqtaýdy damytý respýblıkalyq ortalyǵy» ShJQ RMK-men birlesip, baǵalar, óndirýshiler, tirkeý men jıyntyqtar týraly aqparattar jınaqtalatyn Ulttyq medıtsınalyq tehnıkalardyń derekter bazasyn qurý týraly jumystar júrgiziledi», - dedi «QazMedTeh» AQ basqarma tóraǵasy agenttikke bergen suhbatynda.
Onyń aıtýynsha, bul elimizde qurylǵan Qazaqstan ulttyq dári-dármekter formýlıarynyń analogy bolady.
«Biz bul máseleni tezdetip sheshkimiz keledi. Jospar boıynsha, medıtsınalyq tehnıkalar boıynsha derekter bazasyn qurý 2019 jylǵa kózdelgen», - dep atap ótti kompanııa basshysy.
Rýslan Nurmuhanov habarlaǵandaı, Qazaqstan Respýblıkasy Densaýlyq saqtaý mınıstriniń buıryǵymen Ulttyq medıtsınalyq tehnıkalardyń derekter bazasyn qurý aıasynda Medıtsınalyq buıymdardyń jahandyq tizbektemesi tanyldy.
«QR Medıtsınalyq buıymdarynyń jahandyq tizbektemesi quryldy -nmirk.dari.kz. Qazirgi tańda densaýlyq saqtaý uıymdarynyń teńgerimindegi ulttyq medıtsınalyq tehnıkalardyń derekter bazasyn qurýdy odan ári damytý úshin medıtsınalyq buıymdardyń tizbektemesi portalyn jáne medıtsınalyq tehnıkany basqarý júıesin ıntegratsııalaý máseleleri zerttelýde», - dedi ol.
Osyndaı ulttyq bazany qurýdyń arqasynda densaýlyq saqtaý uıymdary medıtsınalyq tehnıkanyń naqty baǵasy týraly aqparattar ala alady, al bul óz kezeginde medıtsınalyq tehnıkalardy qymbat baǵada satyp alýǵa jol bermeıdi.
«Bolashaqta medıtsınalyq tehnıkalar týraly barlyq málimetter Ulttyq bazada bolady», - dep atap ótti «QazMedTeh» AQ basqarma tóraǵasy.