Qazaqstanda ulttyq kompanııalarǵa basshylyq etetin áıelder sany arttyrylmaq

ASTANA. QazAqparat - Qazaqstanda ulttyq kompanııalarǵa basshylyq etetin áıelder sanyn arttyrýǵa kúsh salynatyn bolady. Bul týraly búgin Aqordada Ekonomıkalyq yntymaqtastyq jáne damý uıymynyń (EYDU) bas hatshysy Anhel Gýrrıamen kezdesken elimizdiń Memlekettik hatshysy Gúlshara Ábdiqalyqova aıtty, dep habarlaıdy QazAqparat.

Kezdesý barysynda Memlekettik hatshy Qazaqstannyń EYDU-men birlese jumys isteýge múddelik tanytatyn birqatar baǵytty atady.

«Men Áıelder isi jónindegi komıssııaǵa da basshylyq jasaımyn. Bul baǵytta jaqsy jetistikterimiz de bar. Bizde Parlamenttiń tómengi palatasyndaǵy áıelderdiń úlesi 27 paıyzdy quraıdy. Qazirgi ýaqytta ulttyq kompanııalarmen, jeke sektormen olardyń Dırektorlar keńesi quramynyń belgili bir bóligin áıelder ıelenýi úshin jumys isteýdemiz. Biz EYDU-men, sizderdiń qurylymdaryńyzben, komıtetterińizben eń birinshi kezekte, ekonomıkaǵa áıelder men jastardy tartý baǵytynda odan ary jumys istegimiz keledi. Ekinshiden, shaǵyn jáne orta bıznesti, ásirese áıelder men jastardy tarta otyryp damytqan jón bolar edi»,-  dedi QR Memlekettik hatshysy.

Sonymen qatar Gúlshara Ábdiqalyqova QR Prezıdenti janyndaǵy birneshe komıssııaǵa basshylyq jasaıtyndyǵyn aıtty. Qazaqstan memlekettik qyzmet, bilim berý, áleýmettik, gýmanıtarlyq jáne genderdik máselelerde EYDU-nyń tájirıbesin engizýge nıetti ekendigin atap ótti.

Kezdesý sońynda Memlekettik hatshy Qazaqstan halyqaralyq qoǵamdastyqtyń senimdi áriptesi retinde EYDU-men ózara is-áreket aıasyn odan ary keńeıtý baǵytyn jalǵastyratyndyǵyn jetkizdi.