Qazaqstanda Ulttyq qoǵamdyq senim keńesi qurylady
NUR-SULTAN. QazAqparat - Prezıdent Qasym-Jomart Toqaev Ulttyq qoǵamdyq senim keńesin qurýdy kózdep otyr, dep habarlaıdy QazAqparat tilshisi.
«Men Ulttyq qoǵamdyq senim keńesin qurý jón dep sheshtim. Onyń quramyna barlyq birlestik ókilderi men jastar enedi. Ulttyq qoǵamdyq senim keńesiniń alǵashqy otyrysy osy jyldyń tamyz aıynda ótedi. Bılik halyqqa bergen barlyq ýádesin oryndaýy tıis», - dedi Qasym-Jomart Toqaev elordadaǵy ulyqtaý rásiminde.
Memleket basshysy bıliktiń osy rettegi basty mıssııasyn atady.
«Tek osylaı ǵana ulttyń birligin, eldegi turaqtylyqty saqtap qalýǵa bolady. Sol sebepti, meniń saılaýaldy platformam josparly túrde júzege asyralady. Osy qujatqa halyqtan túsken úzdik ıdeıalar men usynystar engiziledi», - dedi ol.
Aıta ketsek, elordada jańadan saılanǵan QR Prezıdenti Qasym-Jomart Toqaevty ulyqtaý rásimi ótti. Sharaǵa Úkimet músheleri, Parlament depýtattary, Konstıtýtsııalyq Keńes músheleri, Joǵarǵy Sot sýdıalary, Qazaqstanda tirkelgen dıplomatııalyq korpýs ókilderi jáne basqa da shaqyrylǵan qonaqtar qatysýda.
Táýelsizdik saraıynda Qasym-Jomart Toqaev Qazaqstan halqyna ant berdi. Ant bergen sátten bastap jańadan saılanǵan Prezıdent resmı qyzmetine kirisken bolyp sanalady.
