Qazaqstanda ulttyq geologııalyq qyzmet quryldy

NUR-SULTAN. QazAqparat – Elimizde ulttyq geologııalyq qyzmet memlekettik tirkeýden ótti. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev Májiliste ótken geologııa salasyn damytý taqyrybyna arnalǵan dóńgelek ústel barysynda málim etti, dep habarlaıdy QazAqparat tilshisi.

«Qazir Tsıfrlyq damý, Indýstrııa jáne ınfraqurylymdyq damý mınıstrlikterimen birlesip jer qoınaýyn paıdalaný salasy boıynsha biryńǵaı aqparattyq júıe «Kaznedra» platformasyn qurý boıynsha jumys júrip jatyr. Biryńǵaı platforma barlyq protsesti bir tereze arqyly ınvestorlarǵa keshendi servıstik qoldaý kórsetedi. Búginde atalǵan jobany iske asyrý boıynsha jol kartasy Úkimet qaraýyna engizildi. Sondaı-aq, Prezıdenttiń tapsyrmasy boıynsha «Qazgeoaqparat» jáne «Qazgeologııa» bazasynda ulttyq geologııalyq qyzmet quryldy», - dedi Serikqalı Brekeshev Májilis qabyrǵasynda baıandama jasaı otyryp.

Mınıstrdiń aıtýynsha, ulttyq geologııalyq qyzmet 15 maýsymda memlekettik tirkeýden ótti.

«Jalpy geologııa salasyn memlekettik turǵydan retteýde jetekshi elderde (Avstralııa, AQSh, Ulybrıtanııa, Kanada, Koreıa jáne taǵy basqa) ulttyq geologııalyq qyzmet tabysty jumys atqaryp keledi. Atalǵan qyzmeti salaǵa qatysty barlyq aqparattyń ashyq ári qoljetimdi bolýyna múmkindik beredi. Sonymen qatar ulttyq qyzmetti engizý aıasynda mıneraldyq resýrstardyń ulttyq derekter bazasyn paıdalaný, geologııa salasyna qatysty aqparatty júıelep, taldaý arqyly ınvestorlarǵa keshendi servıstik qoldaý kórsetpekpiz», - deıdi ol.

Buǵan deıin habarlaǵanymyzdaı geologııa salasyn damytýdyń 2026 jylǵa deıingi tujyrymdamasy ázirlendi .