Qazaqstanda ulttyq dárilik formýlıar resmı túrde bekitildi

ASTANA. QazAqparat - Qazaqstanda buǵan deıin pılotty rejımde jumys istep kelgen ulttyq dárilik formýlıar (QUF) resmı túrde iske qosyldy. Tıisti buıryqqa densaýlyq saqtaý jáne áleýmettik damý mınıstri Tamara Dúısenova qol qoıdy. Bul týraly Densaýlyq saqtaýdy damytý respýblıkalyq ortalyǵynyń baspasóz qyzmeti habarlady.

Osylaısha, Qazaqstan TMD elderiniń arasynda mundaı aqparattyq resýrsty iske qosqan alǵashqy respýblıka bolyp otyr. QUF-ty jasaqtaý barysynda farmokoterapııa salasyndaǵy ozyq álemdik tájirıbe basshylyqqa alyndy.    

QUF dárilik kómektiń azamattardyń áleýmettik jaǵdaıy men tabysyna qaramastan bárine birdeı qoljetimdiligin qamtamasyz etedi. Sebebi munda   dári-dármekterdiń shekti baǵalary kórsetilgen. Formýlıar júıeli túrde jańartylyp otyratyndyqtan, medıtsınalyq qyzmetkerlerge dári-dármek túrleri, olardy qoldaný tájirıbesi týraly jańa maǵlumattar alyp, farmatsevtıka salasyndaǵy bilimin jetildirip otyrýǵa múmkindik beredi.

Ulttyq formýlıardy qalyń jurtshylyq ta www.knf.kz saıty arqyly orys jáne qazaq tilderinde  onlaın-rejımde qoldana alady. QUF Dúnıejúzilik densaýlyq saqtaý uıymy maquldaǵan júıe boıynsha qurylǵan. Preparat týraly eń qajetti aqparattyń bári bir bette jınaqtalǵan. Al qajet bolǵan jaǵdaıda, siltemeni ashyp, keńirek maǵlumat alýǵa bolady. Keri baılanys júıesi arqyly saıtty qoldanýshylar óz pikirleri men usynystaryn qaldyra alady. 

 Joba 2015 jyldyń sońynda elimizdiń turǵyndaryna usynylyp otyrǵan dárilerdiń sapasy, qaýipsizdigi men qoljetimdiligi máselelerin sheshý maqsatynda qolǵa alynǵan bolatyn. Oǵan QR DSÁDM Medıtsınalyq jáne farmatsevtıkalyq qyzmetti baqylaý komıteti uıytqy bolǵan. QUF-dy jasaqtaýǵa shet elderdiń tájirıbeli farmakologtary tartyldy. Qazaqstandyq ulttyq formýlıardy mamandarǵa jáne qalyń kópshilikke tanystyryp, qoldanys aıasyn keńeıtý maqsatynda Densaýlyq saqtaýdy damytý respýblıkalyq ortalyǵy elimizdiń aımaqtarynda semınarlar ótkizýdi josparlap otyr.