Qazaqstanda ulttyq sport týraly zań jobasy ázirlenedi
ALMATY. KAZINFORM - 5-shi Dúnıejúzilik kóshpendiler oıyndaryna daıyndyq aıasynda Almatydaǵy Qazaq ulttyq agrarlyq zertteý ýnıversıtetinde «QR-da at sporty men ulttyq jylqy sharýashylyǵynyń qazirgi jaǵdaıy men damý perspektıvalary» atty dóńgelek ústel ótti.
Dóńgelek ústelge QR Ulttyq Ǵylym akademııasynyń prezıdenti, Qazaq ulttyq agrarlyq zertteý ýnıversıtetiniń rektory Aqylbek Kúrishbaev, QR Ulttyq sport qaýymdastyǵynyń prezıdenti Islambek Saljanov, Májilis depýtaty Amanjol Áltaı, sondaı-aq QR Týrızm jáne sport mınıstrliginiń, Aýyl sharýashylyǵy mınıstrliginiń, ǵylymı qoǵamdastyqtyń, sport klýbtarynyń, QR Ulttyq sport qaýymdastyǵynyń ókilderi jáne onyń quramyna kiretin federatsııalardyń basshylary men atbegiler qatysty.
Іs-shara barysynda Qazaqstanda sporttyq jylqy sharýashylyǵyn damytý, at sporty men ulttyq sport túrlerinen mamandar daıarlaý máseleleri talqylandy.
QR Ulttyq sport qaýymdastyǵynyń basshysy Islambek Saljanov óz sózinde ulttyq sport salasyn retteý máselelerine jeke toqtalyp, Qazaqstanda osyǵan deıin bul salany retteıtin birde-bir zań qabyldanbaǵanyn atap ótti.
«QR Ulttyq sport qaýymdastyǵy QR Parlament Májilisiniń depýtattarymen birge Ulttyq sport týraly zań jobasyn ázirleý bastamasyn kóterip otyr. Onyń aıasynda Qazaqstanda etnosportty damytý úshin júıeli qoldaý sharalary kózdeledi», - dedi Islambek Saljanov.
Qazirgi tańda Memleket basshysynyń tapsyrmasy boıynsha qaýymdastyq Qazaqstanda Ulttyq sportty damytýdyń 2024-2029 jyldarǵa arnalǵan tujyrymdamasynyń jobasyn ázirlep jatyr.
Onda ulttyq sport túrlerin damytý máseleleri jáne olardy sheshý joldary kórsetilip, is-qımyl jospary men nysanaly ındıkatorlary usynylady.
Dóńgelek ústel barysynda Qazaqstandaǵy jylqy zaýyttarynyń qazirgi ýaqytta álemdik at sporty ındýstrııasynyń talaptaryna sáıkes kelmeıtin ınfraqurylymdyq damý deńgeıi talqylandy.
Qatysýshylar sport jylqylarynyń sanyn kóbeıtpeıinshe, teńge ilý, kókpar, báıge, aýdaryspaq, jamby atý sııaqty sport túrlerin damytý múmkin emes, sondyqtan sport ǵylymy men sporttyq medıtsınaǵa basa kóńil bólý mańyzdy degen pikirge keldi.
5-shi DKO qarsańynda QR Ulttyq sport qaýymdastyǵynyń bastamasymen Ulttyq sport joǵary mektebi quryldy, alǵash ret Almatydaǵy Sport jáne týrızm akademııasyna – «at sporty túrleriniń jattyqtyrýshysy» mamandyǵy boıynsha jáne Almatydaǵy Agrarlyq ýnıversıtettiń bazasynda «sporttyq jylqy sharýashylyǵyndaǵy veterınarııa» mamandyǵy boıynsha talapkerlerdi qabyldaý bastalady.
Sonymen qatar, qaýymdastyqtyń kómegimen Senat depýtattary qostanaılyq jylqy tuqymyn saqtaý jáne ósimin molaıtý jónindegi zańǵa bastamashy boldy, ol búginde Májiliste qaralý satysynda tur.
Dóńgelek ústel qorytyndysynda birqatar usynys qabyldandy.
Atap aıtqanda, Qazaq ulttyq agrarlyq zertteý ýnıversıteti bazasynda sporttyq jylqylardy baqylaý dopıng zerthanasyn ashý, mal sharýashylyǵy salasy retinde sporttyq jylqy sharýashylyǵynyń jaı-kúıin taldaý jáne basqa.
