Qazaqstanda ulttyq sportty olımpıadalyq sportpen teńestirýge basymdyq beriledi — Erbol Myrzabosynov
ASTANA. KAZINFORM — Týrızm jáne sport mınıstri Erbol Myrzabosynov VI Dúnıejúzilik kóshpendiler oıyndarynda kókpardan Qazaqstan namysyn qorǵaǵan ulttyq qurama oıynshylarymen kezdesti. Bul týraly Sport jáne týrızm mınıstrligi málim etti.
Mınıstr búgingi oıynda sportshylardyń el namysyn abyroımen qorǵap, bar kúsh-jigerin salǵanyn atap ótti. Sondaı-aq sportta jeńis pen jeńilis qatar júretinin aıtyp, eń bastysy — jigerdi jasytpaı, aldaǵy halyqaralyq jarystar men basqa da iri dodalarǵa daıyndyqty jalǵastyrý ekenin jetkizdi.
Aıta keteıik, búginde Qazaqstanda 11 ulttyq sport túri júıeli túrde damytylyp keledi. Ulttyq sport túrlerine memlekettik qoldaý kúsheıtilip, olardy damytý men sportshylardy daıarlaý máselesinde olımpıadalyq sport túrlerimen teń dárejede jaǵdaı jasaýǵa basymdyq berilip otyr.
Erbol Myrzabosynov ulttyq qurama oıynshylaryna aldaǵy halyqaralyq jarystarda sáttilik pen jańa jeńister tiledi.
Eske sala keteıik, Qazaqstan quramasy Dúnıejúzilik kóshpendiler oıyndaryn jalpykomandalyq esepte birinshi orynmen aıaqtady.
Baıraqty dodanyń qorytyndysy boıynsha qazaqstandyq sportshylar 74 medal jeńip aldy. Onyń ishinde 32 altyn, 20 kúmis jáne 22 qola júlde bar. Jalpykomandalyq esepte 30 altyn medal ıelengen Qyrǵyzstan ekinshi orynǵa, jeti altyn júldesi bar Reseı úshinshi orynǵa turaqtady.
