Qazaqstanda ulttyq parkterge kirý tarıfi nelikten ártúrli
ASTANA. KAZINFORM – QR Ekologııa jáne tabıǵı resýrstar mınıstri Erlan Nysanbaev Úkimette ótken brıfıngte ulttyq parkterge kirý tarıfi qalaı ózgeretinin túsindirdi.
Bıyl 8 shildede Memleket basshysy «QR keıbir zańnamalyq aktilerine erekshe qorǵalatyn tabıǵı aýmaqtar jáne elektr energetıkasy máseleleri boıynsha ózgerister men tolyqtyrýlar engizý týraly» Zańǵa qol qoıǵany belgili. Osylaısha, Salyq kodeksinen Erekshe qorǵalatyn tabıǵı aýmaqtardy paıdalanǵany úshin alynatyn tólem respýblıkalyq bıýdjetke túsetini týraly normalar alynyp tastaldy.
«Bizde eki túrli tólem boldy. Onyń biri – salyq, uzaq merzimge deıin qoldanǵany úshin tikeleı bıýdjetke túsetin aqsha. Búgin salyq kodeksinde sol salyqty alyp tastady. Al ekinshisi – qyzmet úshin tólem ornynda qaldy. Baǵana aıtqan salyǵymyz 0,1 AEK boldy. Al qyzmet úshin naqty aıta almaımyn, máselen Almatynyń basyndaǵy Іle-Alataý parkinde ol jerde kisi basynan 200 teńgeden alady. Kólsaı men Sharynda 500 teńge alady», – dedi E.Nysanbaev Úkimette.
Jańa zańǵa sáıkes, QR Bıýdjet kodeksiniń respýblıkalyq jáne jergilikti mańyzy bar erekshe qorǵalatyn tabıǵı aýmaqtardy paıdalanǵany úshin bıýdjet túsimderi týraly normalar ózgerdi. Endi tabıǵat qorǵaý mekemeleri kórsetetin qyzmetter úshin tarıfter mólsherin bekitý quzireti EQTA-ny baqylaıtyn memlekettik organdarǵa berilip otyr.
Ashyq Úkimet portalynda Ekologııa jáne tabıǵı resýrstar mınıstrligi Orman sharýashylyǵy jáne janýarlar álemi komıtetiniń tarıfterge qatysty arnaıy buıryǵy jarııalanǵanyn aıta keteıik.
Onda elimizdegi Ulttyq parkterdiń qyzmetine qatysty alynatyn tólem kólemi kórsetilgen. Aıtalyq, Ústirt memlekettik tabıǵı qoryǵynda mototsıkl, moped, kvadrotsıkl syndy shaǵyn tehnıkalar úshin stavka 1 AEK (3692 t) bolsa, jeńil avtokólikter – 1,5 AEK, 16 adamǵa deıingi shaǵyn avtobýs pen júk kóligi - 4 AEK, 32 adamǵa deıingi avtobýs – 8 AEK, 32-den joǵary adam sııatyn avtobýstar 13 AEK kóleminde tóleıdi.
ıAǵnı, Erekshe qorǵalatyn tabıǵı aýmaqtardy paıdalanǵany úshin kórsetiletin qyzmetterdiń tólemi burynǵysynsha alynady. Alaıda qarajat Ulttyq parkterdiń arnaıy shotynda qalyp, qyzmetkerler jalaqysy, tabıǵatty qorǵaý sharalary, baqylaý-ótkizý beketterin avtomattandyrý, týrıstik soqpaqtardy jaqsartý, qaýipsizdik júıesin jetildirý syndy óz qajettilikterine jumsalady.
Erekshe qorǵalatyn tabıǵı aýmaqtar qyzmetteri úshin tólem alý normasy «Erekshe qorǵalatyn tabıǵı aýmaqtar týraly» QR Zańynyń 38-baby jáne Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń 2020 jylǵy 30 jeltoqsandaǵy №27-5-6/253 buıryǵy («Óziniń qaraýyndaǵy zańdy tulǵa mártebesi bar respýblıkalyq mańyzy bar erekshe qorǵalatyn tabıǵı aýmaqtar kórsetetin qyzmetter úshin tarıfterdiń mólsherin bekitý») arqyly retteledi.
