Qazaqstanda ulttyq quramalardy daıarlaýǵa 20 mlrd teńgeden astam qarjy bólindi – mınıstr
ASTANA. KAZINFORM – 2026 jyly joǵary jetistikter sporty boıynsha ulttyq quramalardy daıarlaýǵa 20 mlrd teńgeden astam qarjy qarastyrylǵan. Bul qarajat jazǵy jáne qysqy Olımpıada baǵdarlamasyna engen sport túrleri boıynsha oqý-jattyǵý jıyndary men halyqaralyq jarystarǵa qatysýǵa jumsalady.
Mınıstrdiń aıtýynsha, atalǵan qarjy Sportty damytý dırektsııasy arqyly joǵary jetistikter sporty baǵytynda bólinedi.
– Joǵary jetistikter sporty boıynsha Sportty damytý dırektsııasy aıasynda jazǵy jáne qysqy Olımpıada baǵdarlamasyna engen barlyq sport túrlerine jarystar men oqý-jattyǵý jıyndaryn ótkizý úshin 20 mlrd teńgeden astam qarajat qarastyrylǵan, – dedi Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda jýrnalısterdiń suraǵyna jaýap bere otyryp málimdedi.
Sonymen qatar mınıstr ulttyq quramalardy daıarlaý tek jarystar men oqý-jattyǵý jıyndaryn uıymdastyrýmen shektelmeıtinin atap ótti.
Sportshylardyń daıyndyǵyna ǵylymı toptar men Ǵylymı-ádistemelik ortalyqtyń jumysy, tamaqtaný, qalpyna keltirý sharalary, sondaı-aq Sporttyq medıtsına jáne ońaltý ortalyǵynyń qyzmeti kiredi.
Budan bólek, óńirler de óz sportshylaryn daıarlaýǵa bıýdjetten qarajat bóledi.
Aıta keteıik, Qazaqstan 2027 jyly bes sport túrinen álem chempıonatyn ótkizedi.