Qazaqstanda Ulttyq krıptovalıýtany taldaý júıesi qurylady
ASTANA. KAZINFORM – Qazaqstanda 2027 jylǵy 1 shildege deıin Ulttyq krıptovalıýtany taldaý júıesin qurý josparlanyp otyr. Bul týraly Qazaqstanda tsıfrlyq aktıvter ındýstrııasyn yntalandyrý jáne damytý sharalaryna arnalǵan baspasóz máslıhatynda Jasandy ıntellekt jáne tsıfrlyq damý mınıstri Jaslan Mádıev aıtty.
Onyń aıtýynsha, jańa júıe krıptovalıýtamen jasalatyn operatsııalardy turaqty baqylaýǵa múmkindik beredi.
– Bul júıe krıptovalıýta operatsııalaryn baqylaýǵa, tranzaktsııalardy taldaýǵa jáne zańsyz qarjy shemalaryn anyqtaýǵa arnalǵan. Naryqtyń ashyq bolýy baqylaý bolmaıdy degendi bildirmeıdi. Azamattardy qorǵaý jáne zańsyz operatsııalardyń aldyn alý – bul jumystyń mańyzdy bóligi, – dedi Jaslan Mádıev.
Sonymen qatar mınıstr ortalyqtandyrylmaǵan qarjy platformalarynyń (DeFi) jumysyna taldaý júrgizilip, olardy retteý tetikteri ázirlenetinin atap ótti.
Aıta keteıik, Qazaqstanda tsıfrlyq aktıvterdi erikti túrde jarııa etý tetigi engiziledi.
