Qazaqstanda Ulttyq qor qarajatyn qaıtarýdyń jańa tártibi qabyldandy
ASTANA. KAZINFORM — Ulttyq qor qarajaty maqsatsyz paıdalanylǵan nemese esepti jyl ishinde ıgerilmegen jaǵdaıda ony qaıtarýdyń jańa reglamenti bekitildi, dep habarlaıdy Joǵary aýdıtorlyq palatanyń baspasóz qyzmeti.
Bul jumys Joǵary aýdıtorlyq palatanyń usynymy boıynsha júzege asyryldy.
Buǵan deıin Joǵary aýdıorlyq palata 2019-2021 jyldar aralyǵynda Ulttyq qordan bólingen nysanaly transfertterdiń tıimdiligine aýdıt júrgizgen.
Aýdıt qorytyndysy boıynsha Qazaqstan Respýblıkasynyń Úkimetine mynadaı usynymdar berildi:
— qarajat ruqsat etilmegen baǵyttarǵa jumsalǵan jaǵdaıda ony qaıtarý qaǵıdalaryn bekitý;
— paıdalanylmaǵan qarajatty qaıtarý merzimi men tártibin naqtylaý úshin tıisti qaýlyǵa ózgerister engizý;
— nysanaly maqsatta paıdalanylǵannan keıin qaıta qoldanýǵa jol bermeý úshin bıýdjettik kredıtter men oblıgatsııalyq qaryzdar túrinde berilgen qarajatty qaıtarý mehanızmin ázirleý.
Nátıjesinde Bıýdjet kodeksine qajetti túzetýler engizildi. Bıyl 2 shildede Ulttyq qormen jumys tártibin jańartatyn Úkimet qaýlysy qabyldandy.
Sonymen qatar Qarjy mınıstrligi 2025 jylǵa arnalǵan birqatar buıryq shyǵardy, atap aıtqanda:
— bıýdjetti atqarý jáne onyń kassalyq qyzmet kórsetý qaǵıdalary;
— qazynashylyq atqarý jáne esepke alý rásimderi;
— Biryńǵaı bıýdjettik synyptama;
— bıýdjet túsimderin ártúrli deńgeıdegi bıýdjetter, Ulttyq qor shottary, bıýdjetten tys qorlar jáne EAEO elderiniń bıýdjetteri arasynda bólý tártibi.
— Memleket basshysy Qasym-Jomart Toqaev Ulttyq qor resýrstaryn tıimdi paıdalaný máselelerine basa nazar aýdarady. Prezıdenttiń tapsyrmasy boıynsha bıyl Ulttyq qordan bólingen qarajattyń jumsalýyn monıtorıngteý jónindegi komıssııanyń jumysy qaıta uıymdastyryldy. Qazirgi ýaqytta bul Komıssııa Joǵary aýdıtorlyq palatanyń janynda jumys isteıdi. Komıssııanyń jumys formaty men quramy Memleket basshysy qoıǵan ózekti mindetterdi eskere otyryp jańartyldy, — delingen vedomstvo taratqan aqparatta.
Budan buryn bıyl alty aıda Ulttyq qor 4,7 mlrd dollar ınvestıtsııalyq tabyspen tolyqqany anyqtaldy.