Qazaqstanda Ulttyq qor qarajatyn basqarý saıasaty ózgeredi

Ulttyq bank tóraǵasy Tımýr Súleımenov Ulttyq qor qarajaty qandaı jobalarǵa salynyp jatqanyn túsindirdi, dep habarlaıdy Kazinform. 

«Bizde eki portfel bar – turaqtandyrý jáne jınaq portfeli. Turaqtandyrý neǵurlym ótimdi sanalady – 17%. Ulttyq qordan shamamen 10 mıllıard teńge turaqtandyrý qorjynynda. Bul qarjy jaǵdaı kúrt nasharlaǵan jaǵdaıda, ótimdi aktıvterdi tez arada satyp, bıýdjetke tıisti transh arqyly kómektesýimiz úshin qajet. Qalǵan 83% – joǵary kiris alýǵa baǵyttalǵan uzaq merzimdi jáne orta merzimdi tetikter. Biz úılestirgen deńgeı 80/20 shamasynda boldy. ıAǵnı, 20 paıyzy aktsııalar men qarjy naryǵynyń basqa da quraldaryna, al 80% damyǵan elderdiń oblıgatsııalaryna salyndy. Olar óte senimdi, biraq kóp kiris bermeıdi», - dedi T.Súleımenov Májilistiń jalpy otyrysynda depýtattardyń suraǵyna jaýap bere otyryp.

UB tóraǵasy Ulttyq qordy basqarý saıasaty ózgeretinin málimdedi.

«Ulttyq qordy neǵurlym progressıvti jáne kóbirek kirispen basqarý úshin bizge ne qajet? Biz tásilderdi 80/20 deńgeıinen 60/40-qa ózgertemiz. ıAǵnı, 60% burynǵysynsha uzaq merzimdegi senimdi baǵaly qaǵazdarda qalady, biraq tabysy tómen. Bul turǵyda biz 40 paıyzyn kirisi joǵary aktıvterge salǵymyz keledi», – dedi T.Súleımenov.

Ol osy máselede teńgerimdi saqtap, paıdaǵa aldanyp qalmaý mańyzdy ekenin atap ótti.

«Óıtkeni eger biz shamadan tys tabystyń sońyna túsip ketsek, paıdaǵa aldanyp qalsaq, 2025-2026 jyldary uzaq merzimdi perspektıvada utylyp qalýymyz múmkin», - dep túsindirdi UB basshysy.

Mysal retinde ol Norvegııa qoryndaǵy jaǵdaıdy keltirdi.

«Byltyr bul qor óziniń qunynyń shamamen 20%-yn joǵaltty. Sebebi olar agressıvti saıasat júrgizdi. Olar aktsııalarǵa kóp ınvestıtsııalady jáne birden aıtarlyqtaı úlken somany joǵaltty. Sondyqtan biz bul teńgerimdi bazalyq túrde, ıaǵnı aktıvterdi úılestirýdi ózgertý arqyly iske asyramyz. Bul óz kezeginde bizge qosymsha jaýapkershilik júkteıdi», - dedi Tımýr Súleımenov.