Qazaqstanda ulttyq gıdrologııalyq qyzmet qurylady

ASTANA. KAZINFORM – Úkimet «Qazgıdrogeologııa» ulttyq gıdrogeologııalyq qyzmetin qurý týraly qaýlyny ashyq NQA-ǵa shyǵardy. 

Kommertsııalyq emes aktsıonerlik qoǵamnyń negizgi qyzmeti – jerasty sý resýrstaryn basqarýdy tsıfrlandyrý, gıdrogeologııa salasynda derekter bazasyn jáne turaqty jumys isteıtin geoaqparattyq júıelerdi qurý. Sonymen qatar jerdi qashyqtyqtan zondtaý derekterin paıdalana otyryp, tsıfrlyq jáne kartografııalyq derekter bazasyn jasap, basqarý.

Qaýlyǵa sáıkes Sý resýrstary jáne ırrıgatsııa mınıstrligi men Qarjy mınıstrligi Ulttyq gıdrogeologııalyq qyzmettiń jarǵysyn bekitedi. Uıymdy ádilet organdarynda tirkeý, memlekettik tirkeý, qarjy-sharýashylyq qyzmetti júzege asyrý jáne uıymnyń múddelerin úshinshi tulǵalar aldynda usynyp, qujattarǵa qol qoıý úshin tulǵany tańdaýy tıis.

«Qazir el ekonomıkasynda jer asty sýlaryn paıdalaný úlesi 7-10% quraıdy. Biz bul resýrstardy aýyz sýmen jabdyqtaý, sýarý jáne jaıylymdyq mal sharýashylyǵy úshin belsendi paıdalanýǵa nıettimiz. Qurylyp jatqan ulttyq gıdrogeologııalyq qyzmet eldiń jerasty sý resýrstaryn barlaý men qorǵaýdy qamtamasyz etýge arnalǵan», – deıdi Sý resýrstary jáne ırrıgatsııa mınıstri Nurjan Nurjigitov.

Qoǵamdyq talqylaý 19 sáýirge deıin júredi.