Qazaqstanda Ulttyq arheologııalyq qyzmet qurylady
ASTANA. KAZINFORM — Álkeı Marǵulan atyndaǵy Arheologııa ınstıtýtynyń bazasynda Ulttyq arheologııalyq qyzmet qurylady. Bul týraly Májilistiń jalpy otyrysynda tarıhı-mádenı mura obektilerin qorǵaý máselelerine arnalǵan zań jobasyn tanystyrǵan depýtat Ashat Aımaǵambetov aıtty.
— Qazir arheologııalyq jumystardy ǵylymı turǵyda baqylaıtyn, úılestiretin naqty mekeme joq. Kim qalaı isteımin dese, solaı isteıdi – bireýi mýzeımen, bireýi ákimdikpen, bireýi jeke ózi betimen áıteýir bilgenin istep júr. Sodan keıin retsizdik, qaıtalaý, baqylaýsyzdyq kóp bolady. Máseleni qalaı sheshemiz? Álkeı Marǵulan atyndaǵy Arheologııa ınstıtýtynyń bazasynda endi Ulttyq arheologııalyq qyzmet qurylady. Bul qyzmet naǵyz arheologııalyq «mı ortalyǵy» bolady, - dedi Májilis depýtaty.
Onyń aıtýynsha, atalǵan qyzmet endi qazba jumystaryna monıtorıng júrgizedi, ǵylymı saraptama jasaıdy. Biryńǵaı aqparattyq júıeni basqarady jáne arheologtarǵa ǵylymı-ádistemelik qoldaý kórsetedi. Qaı kezeńdi, qandaı eskertkishterdi zertteýimiz qajet degen suraqtarǵa da jaýap berýge qaýqarly.
— Kim, qaı jerde, qandaı qazba jumystaryn júrizdi? Ne tabyldy? Ǵylymı ádistemege sáıkes pe? Onyń esebi – tolyq belgisiz. Memleketke tolyq ári senimdi aqparat jetpeıdi. Tek eskertkishter tiziminiń ózi qazir 42 tizimderde shashyrańqy túrde. Al qazba jumystary boıynsha, esepterdi eshkim eshqaıda ótkizbeıdi. ıAǵnı qazbalar bar, biraq esepter joq. Tabylǵan jeke jádigerler bar, biraq jappaı jádigerler men materıaldar joq. Nátıjesinde keıbir eskertkishter qaıta-qaıta zerttelinse, endi bireýleri múlde qaraýsyz qalyp, joıylyp ketip jatyr, - dedi ol.
Ashat Aımaǵambetovtiń aıtýynsha, osy júıesizdikti toqtatylyp, arheologııalyq jumystardyń tolyq tsıfrlyq júıesi engiziledi.
— Kim qaı jerde neni qazyp jatyr? Qalaı qazyp jatyr? Ne tabyldy? Qazbanyń esepteri, eskertkishterdiń pasporttary, arheologtar tizimi — endi osynyń barlyǵy bir tsıfrlyq júıede bolady. Bul júıe salany ashyq qylyp, eseptilik pen tártipti ornatady, - dedi depýtat.
Aıta keteıik, Májilis zańsyz arheologııalyq qazba jumystaryn tyıatyn zań jobasyn talqylap jatyr.