Qazaqstanda ultaralyq kelisimniń biregeı baǵdarlamasy iske asyrylýda - Eýroparlament depýtaty
BRıÝSSELЬ. QazAqparat - Eýropalyq parlamenttiń depýtaty, shetel isteri boıynash Eýropalyq Parlament komıtetiniń múshesi Andreıs Mamykıns qazaqstandyqtardyń bolashaqqa qalaı jol salyp jatqany týraly oı-pikirimen bólisti, dep habarlaıdy «QazAqparat» HAA-nyń menshikti tilshisi.
«Qazaqstan - 130-ǵa tarta ulttyń ókilderi ómir súrip jatqan biregeı memleket. Álbette, ulttardyń birshamasy Qazaqstanda tarıhı turǵyda qaıǵyly jaǵdaılarmen aýyp keldi. Máselen, nemister, latyshtar men lıtvalyqtar týraly osylaı deýge bolady. Qazaqtan árdaıym qonaqjaılyǵymen ǵana emes, basqalarǵa kómek qolyn sozýǵa, basqa ulttardyń basyna bult úıirilgende qamqorlyq jasaı biletin qasıetimen erekshelenedi», - deıdi ol.
Onyń aıtýynsha, ultaralyq kelisimniń qazaqstandyq úlgisin óte joǵary deńgeıde baǵalaýǵa bolady.
«Beıbitshilik pen kelisimniń qazaqstandyq baǵdarlamasy biregeı. Bul baǵdarlama ózge ulttardyń óz tilderinde bilim alýyna, gazet oqýyna, radıostantsııalardy tyńdaýǵa jaǵdaı jasap otyr», - deıdi spıker.
Qazaqstandyq úlgini basqa elderge qoldanýǵa ábden bolady. Mundaı oıdy da óz sózinde Eýropalyq Parlamenttiń depýtaty bildire ketti.
«Qazaqstan Respýblıkasynyń tájirıbesi biregeı. Odan Eýropalyq Odaq ta, men Eýroparlamentke saılanyp otyrǵan Latvııa da úlgi ala alady. Bul jol - óte konstrýktıvti, ári bul ıntegratsııanyń modeli. Álbette, men oǵan óte tamsana qaraımyn. 1 mamyr - Qazaqstan halqynyń birligi kúni. Dál osy kúni Qazaqstandaǵy tili men mádenıeti ártúrli barlyq ult ókilderiniń armandary bir arnaǵa túıisedi», - deıdi Andreıs Mamykıns.
