Qazaqstanda úlken qalalar mańyndaǵy aýyldardy damytýǵa 30 mlrd teńge bólinedi

ASTANA. QazAqparat - Astana, Almaty men Shymkent qalasynyń shetindegi aýyldardyń ınfraqurymyn damytýǵa 30 mlrd teńge bólinedi. Bul týraly Parlament Májilisiniń otyrysynda Qarjy vıtse-mınıstri Tatıana Saveleva málim etti, dep habarlaıdy QazAqparat tilshisi.

«Aımaqtyq ınfraqurylymdy damytý baǵytynda 90 mlrd teńge jumsalady. Memleket basshysynyń tapsyrmasyna sáıkes, 2025 jylǵa deıin bul baǵytta jalpy 920 mlrd teńge aqsha bólinedi. Atap aıtqanda, respýblıkalyq bıýdjetten 680 mlrd teńge, jergilikti bıýdjetten 230 mlrd teńge bólý josparlanyp otyr. Bul baǵyttaǵy qadam jalpy sany 4,5 mln adamǵa qyzmet kórsetetin ınjenerlik-kommýnıkatsııalyq ınfraqurylymdy damytýǵa múmkindik beredi», - deıdi Tatıana Saveleva Parlament Májilisiniń QR-nyń 2019-2023 jyldarǵa arnalǵan áleýmettik-ekonomıkalyq damý boljamyn naqtylaýǵa arnalǵan otyrysy barysynda.

Vıtse-mınıstrdiń aıtýyna qaraǵanda, aımaqtyq ınfraqurylymdy damytý úshin bıyldyń ózinde respýblıkalyq bıýdjetten 441,3 mlrd teńge, onyń ishinde jergilikti joldardy jóndeýge 115,4 mlrd teńge, sýmen qamtý, sý tartý, sý sharýashylyǵyna 171,6 mlrd teńge, elektr energııasymen qamtý baǵytynda 89 mlrd teńge bólinedi.

«Іri qalalardyń shetindegi aýyldardyń máselesin sheshý úshin 30 mlrd teńge bólinedi. Onyń ishinde Astana qalasynyń shetindegi Aqmola oblysyna qarasty aýyldardyń ınfraqurylymy úshin 15 mlrd teńge, Almaty qalasynyń mańyndaǵy Almaty oblysyna qarasty aýyldardyń ınfraqurylymyna 10 mlrd teńge, Shymkenttiń shetindegi aýyldarǵa 5 mlrd teńge bólinedi. Astana shetindegi aýyldar boıynsha jobalar qazir sońǵy kezeńde. Elordada jalpy somasy 22 mlrd teńgeni quraıtyn 13 joba (bilim, sport, ınjenerlik jeli) tańdalyp alyndy. Osy somanyń 7,5 mlrd teńgesi bıyl bólinedi», - deıdi Tatıana Saveleva.

Tatıana Savelevanyń aıtýynsha, Astana mańyndaǵy aýyldarǵa qatysty jobalar segiz turǵyn úı massıvindegi, atap aıtqanda Kóktal-1, Kóktal-2, Ilınka, Úrker shaǵyn aýdany, Óndiris, Temir jol, Ońtústik Shyǵys aýmaǵyndaǵy máselelerdi sheshýge arnalǵan.

«Aqmola oblysy boıynsha jalpy quny 25,6 mlrd teńgeniń 22 jobasy (bilim, densaýlyq saqtaý, jylýmen qamtý, sýmen tartý, jol) iriktelip alyndy. Osy somanyń 7,5 mlrd teńgesi atap ótkenimdeı bıyl aýdarylady. Atalmysh jobalar Qosshy, Aqmol, Qaraótkel, Qoıandy, Jibek joly, Maksımovka, Shubar, Volgodonovka, Bozaıǵyr, Nur Esil men 96-shy rezez aýdandaryndaǵy kezek kúttirmeıtin máselelerdi sheshýge baǵyttalǵan», - deıdi ol.