Qazaqstanda úleskerlerdi qoldaý ortalyǵy qurylady

ASTANA. KAZINFORM — Úleskerlerdi qoldaý ortalyǵynda azamattarǵa turǵyn úıdi qaýipsiz satyp alý jóninde keńes beriledi.

Bul týraly Ónerkásip jáne qurylys mınıstrligi qala qurylysy jáne turǵyn úı-kommýnaldyq saıasat departamentiniń qurylys salasyn damytý basqarmasynyń basshysy Erlan Kúlishev málim etti. 

— Zań jobasynda turǵyn úı saıasaty jaǵdaıyn jaqsartýǵa baǵyttalǵan qosymsha sharalar kózdelgen. Atap aıtqanda, qurylys jáne turǵyn úı-kommýnaldyq sharýashylyq isteri komıteti alańynda úleskerlerdi qoldaý ortalyǵy qurylady. Ol ortalyqta azamattarǵa turǵyn úıdi qaýipsiz satyp alý jóninde keńes beriledi. Sondaı-aq ortalyqta qurylys kompanııasynyń ruqsaty men biryńǵaı operatordan alǵan kepildiginiń bar-joǵy týraly aqparat beriledi, — dedi Erlan Kúlishev elordada «Atameken» UKP alańynda ótken jıynda.

Sonymen qatar, vedomstvo ókili merdigerge beriletin avanstyq tólemniń lımıti de ulǵaıatynyn aıtty.

— Eger avanstyq tólemdi qaıtarý boıynsha bank kepildigi bar bolsa, tólemniń shekti mólsheri 25%-dan 50%-ǵa deıin ulǵaıtylady, — deıdi ol.

Búgin elordada «Atameken» ulttyq kásipkerler alańynda «Turǵyn úı qurylysyna úlestik qatysý týraly» zańy talqylandy. Jıynǵa quzyrly organdar ókilderi, qurylys kompanııalarynyń basshylary men bıznes ókilderi qatysty. 

Buǵan deıin habarlaǵanymyzdaı elimizde qurylys kompanııalaryna kepildik alý talaptary jeńildeıdi. 

Sondaı-aq jıyn barysynda elimizde keıbir turǵyn úı qurylysynyń problemaǵa aınalý sebepteri aıtyldy.