Qazaqstanda uldar men qyzdar bólek oqytylýy múmkin be - Saǵadıevtiń jaýaby
ASTANA. QazAqparat - Qazaqstanda uldar men qyzdar bólek oqytylýy múmkin be? Bul saýaldyń jaýabyn búgin QR Parlamenti Senatynda ótip jatqan «Orta bilim berý júıesiniń jaı-kúıi, problemalary jáne zańnamalyq retteý perspektıvalar» taqyrybyna arnalǵan parlamenttik tyńdaý barysynda QR bilim jáne ǵylym mınıstri Erlan Saǵadıev berdi, dep habarlaıdy QazAqparat.
Aıta keterligi, parlamenttik tyńdaý barysynda senator Sársenbaı Eńsegenov mınıstrden: «Tárbıesiz bilimniń zııandylyǵy, tipti qaýiptiligi týraly orta ǵasyrda ómir súrgen oıshyldar aıtyp ketken. Sondyqtan mekteptegi bilim berý tárbıemen birge júrý kerek dep oılaımyn. Rýhanı jańǵyrýda aıtylǵan ulttyq kodty engizýde mektep tárbıesiniń bereri kóp. Osy oraıda sońǵy kezderi bólip oqytý máselesi aıtylýda. Ásirese, qyz balalarǵa arnalǵan arnaıy mektepter bolsa deýde. Onyń ǵylymı negizdemesi de jazylyp júr. Osy máselege oraı sizdiń kózqarasyńyzdy bilgim keledi», - degen edi.
Osy máselege qatysty kózqarasyn bildirgen mınıstr mundaı usynysty durys emes dep sanaıtyndyǵyn aıtty.
«Meniń oıymsha, Qazaqstanda qyzdarǵa, uldarǵa arnalǵan mektepterdiń bolýy durys emes. Bizde ondaı dástúr bolmaǵan. Endi ony salamyz desek, onda aldymen qoǵamdyq úlken pikirlesý jumystaryn júrgizip alýymyz kerek»,- dedi Erlan Saǵadıev.
