Qazaqstanda UQShU ujymdyq kúshteriniń oqý-jattyǵýyn ótkizý josparlanǵan

MÁSKEÝ. QazAqparat - Máskeýdegi Ujymdyq qaýipsizdik týraly shart uıymynyń daǵdarysqa den qoıý ortalyǵynda UQShU Birikken shtabynyń baspasóz konferentsııasy ótti, dep habarlaıdy QR Qorǵanys mınıstrliginiń baspasóz qyzmeti.

Konferentsııa onlaın túrde ótti. Oǵan atalǵan uıymǵa múshe elderdiń qorǵanys vedomstvolary men buqaralyq aqparat quraldarynyń ókilderi qatysty.

Ujymdyq qaýipsizdik týraly shart uıymy Birikken shtabynyń bastyǵy general-polkovnık Anatolıı Sıdorov uıymnyń jaýapkershilik aımaǵyndaǵy: Shyǵys Eýropa, Kavkaz jáne Ortalyq Azııa aımaqtaryndaǵy áskerı-saıası ahýalǵa baǵa berdi.

Baspasóz konferentsııasynda UQShU Ujymdyq qaýipsizdik júıesiniń kúshteri men quraldaryn basqarý organdary men quralymdarynyń ótken jylǵy birlesken daıyndyǵynyń qorytyndysy shyǵaryldy.

Negizgi kúsh-jiger UQShU áskerlerin (ujymdyq kúshterdi) basqarý júıesi men kúshterin qoldaný jáne olardy iske asyrýdaǵy sheshimderdi qabyldaý tetikterin jetildirýge baǵyttalǵany atap ótildi.

2022 jyly Qazaqstanda «Eshelon» materıaldyq-tehnıkalyq qamtamasyz etý kúshteri men quraldarynyń arnaıy oqý-jattyǵýyn, «Іzdeý» barlaý kúshteri men quraldarynyń arnaıy oqý-jattyǵýyn jáne UQShU jedel den qoıý ujymdyq kúshteriniń «Ózara is-qımyl» birlesken oqý-jattyǵýyn ótkizý josparlanýda.

Baspasóz konferentsııasynyń sońynda UQShU Birikken shtabynyń bastyǵy general-polkovnık Anatolıı Sıdorov UQShU-ǵa múshe elderdiń buqaralyq aqparat quraldary ókilderiniń suraqtaryna jaýap berdi.