Qazaqstanda ýkraınalyq kondıter ónimderinen benzapıren anyqtalǵan joq
ASTANA. 5 tamyz. QazAqparat - Qazaqstanda ýkraınalyq Roshen kondıter fabrıkasynyń ónimderinen benzapıren anyqtalǵan joq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Densaýlyq saqtaý mınıstrligi Memlekettik sanıtarlyq-epıdemıologııalyq baqylaý komıtetiniń tóraǵasy Jandarbek Bekshın málimdedi.
«Kedendik kelisimder boıynsha qaýipti ónimder anyqtalyp jatsa, onda Kedendik odaqqa qatysýshy memleketter 24 saǵattyń ishinde resmı aqparat berýleri qajet. Degenmen, osyndaı aqparatty kútip otyrmastan, biz osy ónim túrleri keńinen taralýy múmkin eki qalada, Astana men Almatyda tekserý jumystaryn júrgizdik», - dep túsindirdi J. Bekshın.
Toqtala ketetin jaıt, Reseı aýmaǵyna ýkraınalyq Roshen fabrıkasynyń kondıterlik ónimderin ákelýge tyıym salynǵan bolatyn. Oǵan sebep atalmysh fabrıka tarapynan shyǵarylatyn ónimniń sapasy men qaýipsizdigi talapqa jaýap bermegen edi.
