Qazaqstanda úkimettik emes uıymdar qarqyndy damyp keledi -A.Soloveva

ASTANA. 26 qarasha. QazAqparat /Aıdar Ospanálıev/ - Qazaqstanda úkimettik emes uıymdar qarqyndy damyp keledi. Olardyń sany elimizde kún ótken saıyn ulǵaıyp otyr. Biraq bizge qazir sannan sapaǵa aýysatyn ýaqyt jetken sııaqty.

Bul týraly búgin EQYU Sammıtiniń Sholý konferentsııasynda Qazaqstannyń azamattyq alıansynyń tóraıymy Aıgúl Soloveva málim etti.

Onyń aıtýynsha, úkimettik emes sektorda sapa bolýy úshin olar atqarǵan ister damyǵan elderdegideı ishki jalpy ónimniń 7-8 paıyzyn quraýy qajet. «Al bizdegi ólshemder boıynsha qazir bul kórsetkish 1 paıyzdyń aınalasynda. Úkimettik emes sektordyń ishki jalpy ónimge degen úlesi osy sektordyń azamattardyń qajettilikteri jóninde kóbirek bilýimen jáne sol qajettiliktermen kóbirek aınalysýmen baılanysty. Sonda ǵana biz elde azamattyq qoǵam qalyptastyra alamyz»,- dedi A. Soloveva.

Onyń pikirinshe, úkimettik emes uıymdar halyq pen bıliktiń arasyndaǵy baılanys. Qazir bul baılanys barynsha jandanyp keledi.