Qazaqstanda UFC týrnırin ótkizýge laıyq eki arena ataldy
ASTANA. KAZINFORM – Qazaqstan MMA federatsııasynyń prezıdenti Saǵyndyq Mekeev elimizde alǵash ret UFC týrnırin ótkizýge qolaıly eki sport nysanyn atady, dep habarlaıdy Sports.kz.
Onyń pikirinshe, UFC týrnırin Almatydaǵy «Almaty Arena» nemese Astanadaǵy «Barys Arena» sport kesheninde uıymdastyrýǵa bolady.
– Mundaı eki arena bar. Olar – Almatydaǵy «Almaty Arena» men Astanadaǵy «Barys Arena». Bul UFC týrnırin ótkizýge eń qolaıly ári yqsham eki arena. Árıne, olar 20 myń kórermenge arnalǵan stadıon emes. Biraq shamamen 12 myń orynǵa parterdegi qosymsha 2-3 myń oryndy qossaq, meniń oıymsha, bul jetkilikti, – dedi Saǵyndyq Mekeev.
Federatsııa basshysy atalǵan eki nysannyń da halyqaralyq deńgeıdegi aralas jekpe-jek týrnırin qabyldaýǵa múmkindigi bar ekenin atap ótti.
Aıta keteıik, buǵan deıin Týrızm jáne sport mınıstri Erbol Myrzabosynov Qazaqstanda UFC týrnırin 2027-2028 jyldary ótkizý múmkindigi talqylanyp jatqanyn málimdegen edi. Kelissózderdiń qorytyndysy qarasha aıynyń sońynda jarııalanady.