Qazaqstanda UFC týrnıri qashan ótedi
ASTANA. KAZINFORM – Qazaqstanda UFC týrnırin ótkizý máselesi boıynsha jyl basynan beri birneshe kelissóz júrgizilgen. Naqty sheshim 2027–2028 jyldary týrnırdi uıymdastyrý múmkindigine qatysty aı sońynda jarııalanady. Bul týraly QR Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda jýrnalısterdiń suraǵyna jaýap bere otyryp málimdedi.
Buǵan deıin áleýmettik jeliler men buqaralyq aqparat quraldarynda UFC ókilderiniń Qazaqstanǵa kelip, kelissózder júrgizgeni týraly aqparat taraǵan edi. Mınıstrdiń aıtýynsha, halyqaralyq lıga ókilderimen jumys kezdesýleri ótip, kelissózder belsendi túrde jalǵasyp jatyr.
– Jyl basynan beri UFC boıynsha birneshe kelissóz júrgizdik, naqty jumys kezdesýleri ótti. Qazir kelissózder belsendi júrip jatyr. Aıdyń sońynda UFC týrnırin 2027–2028 jyldary ótkizý máselesi boıynsha qandaı sheshimge kelgenimizdi tolyǵyraq jarııalaımyz. Barlyq jumys atqaryldy, aıdyń sońynda onyń qorytyndysyn qosymsha habarlaımyz, – dedi Erbol Myrzabosynov.
Ázirge UFC týrnırin Qazaqstannyń qaı qalasynda ótkizý josparlanyp otyrǵany naqtylanǵan joq. Mınıstr bul másele boıynsha da qosymsha aqparat aı sońynda belgili bolatynyn aıtty.
Buǵn deıin Shavkat Rahmonov qańtardaǵy UFC týrnırine qatyspaıtynyn jazǵanbyz.