Qazaqstanda ÚEU qyzmetin toqtatý protsedýrasyn jeńildetý josparlanýda
Qazaqstan Respýblıkasy Din isteri jáne azamattyq qoǵam mınıstrligi taratqan málimette: «Jumys jasamaıtyn ÚEU sany esep kezinde qıyndyqtar týdyrady, azamattyq qoǵamnyń damýy men jaǵdaıy týraly statıstıkalyq jáne ózge de kórsetkishterdiń burmalanýyna ákep soqtyrady. Osy másele úkimettik emes uıymdarmen Qazaqstannyń VII Azamattyq forýmynda kóterilgen bolatyn. Olarmen atalǵan máseleni sheshý úshin usynymdar berildi», - delingen.
Qazirgi ýaqytta QR Parlamentinde Salyq kodeksiniń jobasy qarastyrylyp jatyr, oǵan áreket etpeıtin ÚEU-lardy taratý úrdisin jeńildetetin normalar engizilgen.
«Atalǵan normalardyń qabyldanýy áreket etpeıtin zańdy tulǵalardy taratý úrdisin birshama jeńildetedi jáne olardyń statıstıkasyna oń áserin tıgizedi», - dep túsindirdi QR Din isteri jáne azamattyq qoǵam mınıstrliginde.
Sonymen, QR Salyq kodeksiniń 93-babynda salyq tóleýshilerdiń qyzmetin eriksiz toqtatý tártibi qarastyrylǵan. Eriksiz taratýǵa áreket etpeıtin, belgili talaptarǵa sáıkes zańdy tulǵalar jatqyzylatyn bolady. Mysaly, Salyq kodeksinde bekitilgen talap qoıý merzimine saı salyq eseptiligin bermese, qarjymen operatsııalar jasamasa, QSS tóleýshi retinde esepte turmasa, áleýmettik tólemder boıynsha qaryzy bolmasa jáne t.b. Salyq organy 93-bapqa saı keletin sýbektilerdiń monıtorıngin turaqty negizde júrgizip, sáıkesinshe sharalardy qabyldaıtyn bolady.
Sonymen qosa, Salyq kodeksiniń jobasynda memlekettik kirister organdarynyń quzyretine sot sheshimi boıynsha zańdy tulǵalardy taratý úshin sheshim qabyldaı alý múmkindigi bar negizderdiń tizimimen tolyqtyryldy. Salyq kodeksin qabyldaý kezinde memlekettik kirister organdary sotqa QR Azamattyq kodeksinde rettelgen negizgi tórt baǵyt boıynsha zańdy tulǵalardy taratý týraly shaǵym beredi. Olar: bankrottyq, zańdy tulǵanyń tirkelýin jaramsyz dep taný, zańdy tulǵanyń ornalasqan jeri nemese faktili mekenjaıy boıynsha joqtyǵy, qyzmetin zańnamany qatań buzýshylyq jolymen iske asyrýy.
