Qazaqstanda ÚEU-ge grant bólý protsedýrasy jeńildetiledi

ASTANA. QazAqparat - Qazaqstanda úkimettik emes uıymdarǵa granttar bólý protsedýrasy jeńildetiledi. Bul jaıynda búgin QR Din isteri jáne azamattyq qoǵam mınıstrliginiń jumys nátıjesine arnalǵan qoǵamdyq keńes otyrysynda mınıstr Nurlan Ermekbaev málim etti, dep habarlaıdy QazAqparat.

«Qoǵam qalaýyn eskere otyryp, ÚEU-ler úshin granttar bólý erejesin qaıta qarastyryp jatyrmyz. Jańa ereje boıynsha granttardy bólý protsedýrasy barynsha ońaı bolady», - dedi mınıstr.

Ermekbaevtyń aıtýynsha, jańa erejede sarapshylyq komıssııany jasaqtaý tártibi jeke jazylyp, atalǵan komıssııa quramyna kire alatyn sarashylardyń tizimi jónindegi ereje engiziledi.

«Bul músheler quramy granttar taqyrybyna sáıkes kelýi úshin jasalady», - dep túsindirdi ol.

Sonymen qatar ol jańa erejege sáıkes granttar baǵytynyń tizimi, granttyq qarjylandyrý operatory qoryn jasaqtaý kózderi keńeıtiletin bolady.

«Qazirgi ýaqytta operator qory mınıstrlik bıýdjeti arqyly ǵana tolyqtyryla alady. Bolashaqta biz ákimdikter men basqa da mınıstrlikter operatorlardyń granttaryna arnalǵan qarjyny tikeleı bóle alatyn bolady dep úmittenemiz», - dedi Ermekbaev.

Aıta keterligi, mınıstr derekterine sáıkes, aǵymdaǵy jyly granttyq qarjylandyrý kólemi úsh esege jýyq artyp 612,5 mln. teńgege, al memlekettik áleýmettik tapsyrys 8,8 mlrd. teńgege deıin jetip otyr. Bıyl granttyq qarjylandyrý operatory 47 joba usyndy. Oǵan 183 uıymnan 320 ótinip tústi.