Qazaqstanda UBT-ǵa daıyndyq kýrsynyń baǵasy qansha
ASTANA. KAZINFORM — Jańa oqý jyly bastalǵanda elimizde UBT kýrstary men repetıtorǵa suranys artty. Oqý ortalyqtary keler jyly mektep bitiretin túlikterdi toptyq kýrsqa qabyldap jatyr. Keıbir ata-ana balasy úshin jeke sabaqty tańdaıdy, dep habarlaıdy Kazinform tilshisi.
Kýrs baǵasy túrli kórsetkishke qaraı ózgerip otyrady. Aldymen UBT-ǵa daıyndaıtyn pedagogtiń tájirıbesi qaraıdy. Jeke repetıtordy tańdaǵanda da muǵalimniń bilimi men biligine kóp mán beredi.
Baǵany salystyrý kezinde biz synaqqa qajetti bes pándi tańdadyq. Toptyq oqytý quny saralandy. Sonymen birge jeke oqytý kýrstarynyń da baǵasyn salystyryp kórdik. Ár pánniń baǵasy akademııalyq saǵatqa saı esepteledi.
Baǵasy eń tómen kýrs Pavlodar qalasynda tabyldy. Munda daıyndyq baǵasy 20 000 teńgeden bastalyp, 100 000 teńgege jetti. Al repetıtorlar ár sabaqqa orta eseppen 3 000 teńgeden bastap 9 000 teńgege deıin alady.
Odan ári Oral qalasy tur. Munda baǵa 25 000 — 50 000 teńge aralyǵynda. Eń joǵary baǵa ózgege qaraǵanda tómen. Bul óńirde repetıtorlardyń qyzmet aqysy da ózgege qaraǵanda arzan. Baǵasy — 2 500 — 4 000 teńge aralyǵynda.
Taraz qalasynda UBT-ǵa daıyndyq kýrsynyń baǵasy 30 000 teńgeden bastalady. Mundaı aqshaǵa úzdik pedagogterden sabaq ala almaısyz. Bilikti ári tájirıbeli muǵalimderden quralǵan kýrs baǵasy 70 000 teńge bolady. Tek bir balaǵa ǵana dáris berse ár saǵaty 2 000 teńgeden bastalyp, 10 000 teńge jetedi.
Qaraǵandy men Taldyqorǵan qalalarynda toptyq kýrs baǵasy 40 000 teńgeden bastalady. Eki qaladaǵy eń qymbat kýrstyń arasynda biraz aıyrmashylyq bar. Qaraǵanda qalasyndaǵy repetıtorlar saǵatyna 5 000–7 000 teńge, al Taldyqorǵanda 3 000–5 000 teńge alady.
Túrkistan qalasynda balany emtıhanǵa daıyndaý aqysy 45 000 teńgeden bastalyp tur. Al jeke oqytýdy tańdaǵan ata-ana balasyna 3 000 — 4 000 teńge tóleıdi. Bul pedagogtiń ár saǵatqa alatyn aqysy.
Almaty, Ekibastuz, Semeı, Qyzylorda men Petropavlda bes pánge arnalǵan kýrs baǵasy 60 000 teńgeden bastalady. Eskere keterlik jaıt, bul qalalardaǵy eń joǵary baǵada aıtarlyqtaı aıyrmashylyq baıqalmaıdy. Tek Petropavl qalasynda eń joǵary baǵa 70 000 teńge bolyp tur. Al jeke oqytýǵa keler bolsaq, Almaty qalasynda saǵatyna 3 000 — 10 000 teńge aralyǵynda. Ekibastuz, Semeı men Qyzylordada 2 000 teńgeden bastalsa, Petropavlda 2 500 teńge jáne odan joǵary.
Jezqazǵan, Aqtóbe men Aqtaý qalalarynda kýrs baǵasy aıyna 65 000 teńge jáne odan joǵary. Osy qalalar arasynda Aqtóbede baǵa joǵary. UBT daıyndaýǵa keıbiri aıyna 150 000 teńge alady. Al ár pándi jeke oqytý aqysy shamamen 2 000 teńgeden bastalady. Bul Qazaqstandaǵy ortasha baǵa.
Shymkent, Qostanaı men Óskemen qalalarynda emtıhanǵa daıyndyq baǵasy 70 000 teńgeden bastalady. Óskemende repetıtor aqysy 2 000 — 9 000 teńge aralyǵynda, Shymkentte 3 000 teńgeden bastap, 20 000 teńgege deıin barady. Al Qostanaıda 4 000 — 12 000 teńge aralyǵynda.
Kýrs baǵasy Astana men Kókshetaý qalalarynda joǵary. Elordada tolyq kýrs baǵasy aıyna 300 000 teńgege deıin jetedi. Munda jas repetıtorlar saǵatyna 2 000 teńge alsa, tájirıbeli mamandardyń dárisi 10 000 teńge turady. Kókshetaý qalasynda jeke muǵalimder saǵatyna 4 000 — 6 000 teńge alady.
Eske salsaq, buǵan deıin Qazaqstandaǵy balalarǵa arnalǵan shyǵarmashylyq úıirmeleriniń baǵasy týraly jazyldy.
