Qazaqstanda TJ rejımi kezinde túrmeden 300-ge jýyq adam bosady
NUR-SULTAN. QazAqparat – Qazaqstanda tótenshe jaǵdaı rejımi kezinde túrmeden 300-ge tarta adam bosap shyqty, dep habarlaıdy QazAqparat tilshisi QR ІІM Qylmystyq-atqarý júıesi komıtetine silteme jasap.
«Tótenshe jaǵdaı rejımi kezinde sottalǵan 322 adam úıine oraldy. Onyń ishinde 282 adam qylmystyq-atqarý júıesi qyzmetkerleriniń ilesip júrýimen turǵylyqty jerine jetkizildi. Qalǵany týǵan-týystarymen ketse, keıbiri áleýmettendirý ortalyqtary men qoǵamdyq pansıonattarǵa ornalastyryldy», - dedi komıtet tóraǵasynyń orynbasary Meıram Aıýbaev.
Sottalǵan, biraq túrmeden bosatylǵan adamdardy úıine deıin jetkizip tastaý týraly sheshim karantın kezindegi qozǵalystyń kúrdelenýine baılanysty jáne koronavırýs ınfektsııasynyń taralýyn boldyrmaý maqsatynda qabyldanǵan.
«Sonymen qatar ony túrmeden tikeleı jibere salsa, bóten qalada jumyssyz qalyp, qylmysqa qaıta barýy múmkin edi. Aıta keterligi, QR Іshki ister mınıstriniń buıryǵymen Qylmystyq-atqarý júıesi komıteti TJ ýaqytynda bostandyqqa shyqqan adamdardy jetkizip salý boıynsha arnaıy algorıtm bekitken edi. Ol áli de kúshinde. Eń birinshi kezekte olardyń blokpostan ótý tártibi men óńirlerdegi jedel shtabtarmen birge alyp júrý baǵdarlary retke keltirildi. Bosatylǵandarǵa ilesip júrýge probatsııa qyzmetiniń mamandary tartyldy. Olar óz óńirindegi blokpostar sheginde ilesip júrdi. Jolda túrmeden shyqqan azamattar tamaqpen jáne qorǵanys quraldarymen qamtyldy», - delingen komıtettiń habarlamasynda.
Máselen Shyǵys Qazaqstanda túrmeden shyqqan 187 adam probatsııa qyzmetiniń mamandarynyń kómegimen kedergisiz úıine oralǵan.
