Qazaqstanda tyıym salynǵan DVK uıymynyń úsh jaqtaýshysyna úkim shyǵaryldy

NUR-SULTAN. QazAqparat – Qazaqstanda tyıym salynǵan DVK ekstremıstik uıymynyń úsh jaqtaýshysyna úkim shyǵaryldy. Bul týraly QR Bas prokýratýrasy Qylmystyq qýdalaý qyzmeti basshysynyń orynbasary Eldos Qılymjanov málim etti, dep habarlaıdy QazAqparat tilshisi.

«Buǵan deıin habarlanǵandaı, sol kúnderi jappaı tártipsizdikterge Qazaqstanda tyıym salynǵan «DVK/ Kóshe» (DVK) ekstremıstik uıymynyń jaqtaýshylary belsendi qatysty. Shymkent qalasynda sot úkimimen osy uıymnyń úsh jaqtaýshysy 3 jylǵa bas bostandyǵynan aıyryldy», - dedi Eldos Qılymjanov Ortalyq kommýnıkatsııalar qyzmetinde.

Onyń aıtýynsha, olar jappaı tártipsizdikterge qatysýǵa shaqyrǵan. Sonymen qatar, atalǵan úsh adam memlekettik múlikke zaqym keltirgen.

Bul is boıynsha sot aktisi zańdy kúshine engen joq.

Budan buryn habarlanǵandaı, qazirgi kezde arnaıy prokýrorlardyń is júrgizýinde jappaı tártipsizdikter boıynsha 53 jáne terrorızm aktilerine qatysty 32 qylmystyq is bar .

Memlekettik obektilerdi órtteý, múlikterdi joıý jáne terrorızm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili boldy.