Qazaqstanda túziletin 4,5 mln tonna qaldyqtyń tórtten biri ǵana óńdeledi
ASTANA. KAZINFORM — Sońǵy jyldary elimizde qoqysty suryptaý keshenderin salý jáne polıgondardy jańǵyrtý máselesi jıi kóterilip keledi. Osyǵan baılanysty jýrnalıster Ortalyq kommýnıkatsııalar qyzmetinde ótken brıfıng barysynda 2024–2025 jyldary naqty qandaı nysandar paıdalanýǵa berilgenin, bul zamanaýı turmystyq qatty qaldyqtarmen (TQQ) jumys isteý ınfraqurylymymen halyqty qamtý deńgeıine qalaı áser etkenin jáne aldaǵy eki jylǵa qandaı jospar baryn surady.
Bul suraqqa QR Ekologııa jáne tabıǵı resýrstar mınıstrligi Qaldyqtardy basqarý departamentiniń dırektory Rýslan Túkenov jaýap berdi.
— Jalpy kommýnaldyq qaldyqtardy basqarý kún tártibinen túspeıtin ózekti másele. Statıstıkaǵa súıensek, respýblıka boıynsha jyl saıyn shamamen 4,5 mln tonna turmystyq qatty qaldyq túziledi. Qazirgi tańda onyń shamamen 25 paıyzy ǵana qaıta óńdelip otyr. Al bul kórsetkishti 2030 jylǵa deıin «jasyl ekonomıkaǵa» kóshý tujyrymdamasy aıasynda 40 paıyzǵa deıin jetkizý mindeti tur. Óńirlerde jergilikti atqarýshy organdardyń kúshimen osyndaı jobalar kezeń-kezeńimen iske asyrylyp jatyr, — dedi ol.
Departament basshysynyń aıtýynsha, 2024 jyly Atyraý qalasynda jylyna 150 myń tonna qaldyqty suryptaýǵa qaýqarly qoqys suryptaý jelisi paıdalanýǵa berilgen. Sondaı-aq bıyl jeńildetilgen qarjylandyrý tetigi aıasynda Qostanaı oblysynda da jańa nysan iske qosyldy.
— Atap aıtqanda, Rýdnyı-Abat JShS qaldyqtardy óńdeýge arnalǵan qýaty jylyna 70 myń tonna bolatyn, al turmystyq qaldyqtardy suryptaý qýaty 50 myń tonnaǵa jetetin keshen paıdalanýǵa berildi, — dedi spıker.
Onyń málimetinshe, búginde osy tetik aıasynda jalpy sany 63 joba maquldanǵan. Olardyń jıyntyq suryptaý qýaty shamamen 2 myń tonnaǵa, al qaıta óńdeý qýaty 1 mln tonnaǵa jýyqtaıdy.
— Mundaı iri jobalardy iske asyrý belgili bir ýaqytty talap etedi. Oǵan aldyn ala zertteý júrgizý, jobalaý, memlekettik ekologııalyq saraptamadan ótý, qurylys-montaj jumystary, keıin tolyqqandy paıdalanýǵa berý kezeńderi kiredi. Bul úderister aldaǵy 2–3 jyldy qamtıdy. Atalǵan jobalar kezeń-kezeńimen iske qosylǵan saıyn, biz ózimizge alǵan mindettemelerge birtindep qol jetkizemiz dep oılaımyn, — dep túıindedi vedomstvo ókili.
Buǵan deıin úsh qalada qaıta óńdeýge jatpaıtyn qaldyqtardy kádege jaratý zaýyty salynatynyn jazǵanbyz.