Qazaqstanda túzetý mektepteri quny 627 mln teńge bolatyn jabdyqtarmen qamtyldy
ALMATY. QazAqparat - Qazaqstanda túzetý mektepteri quny 627 mln teńge bolatyn jabdyqtarmen qamtyldy, dep habarlaıdy QazAqparat tilshisi.
Bul týraly búgin Almatyda Qazaqstandaǵy 100 túzetý mektebin arnaıy tehnıkalyq jáne damytýǵa arnalǵan quraldarmen jabdyqtaý jobasynyń qorytyndysyn jasaý maqsatynda uıymdastyrylǵan semınar-keńes barysynda aıtyldy, dep habarlaıdy QazAqparat tilshisi.
Bul mekemeler «Samuryq-Qazyna» AQ kompanııalar tobynyń «Meniń elim» áleýmettik ınvestıtsııalardy damytý baǵdarlamasynyń aıasynda jabdyqtaldy.
Atap aıtqanda, jalpy bilim beretin mektepter baıqaý negizinde avstrııalyq sport quraldarymen, al mýzykalyq mektepter mýzykalyq quraldarmen jáne aspaptarmen qamtamasyz etildi.
Sondaı-aq túzetý mektepteri arnaıy kabınetterge qajetti túzetý quraldarymen jabdyqtaldy. Logoped jáne defektologtardyń kabınetine logopedıalyq trenajer pen massaj zondtary alyndy. Bunyń barlyǵy usaq motorıkany, estý jáne kórý qabiletin, este saqtaý qabileti men synı oılaýdy jáne balalardyń relaksatsııasyn damytý úshin jasalǵan.
«Joba Qazaqstandaǵy barlyq 100 túzetý mektebin qamtydy, bul 15 myńnan astam bala. Buǵan 627 mıllıonnan astam qarajat jumsaldy. Alaıda bizdiń kúsh-jigerimiz ben qarjy resýrstarymyz balalar men mektepterge qajetti kómek kóleminiń 15% -yn ǵana japty. Muǵalimdermen suhbattasý barysynda joıý kerek bolatyn kóptegen máseleler anyqtaldy. Búgingi kúni osy jerge Bilim mınıstrliginiń jáne basqa da mamandandyrylǵan uıym ókilderiniń kelýi osy máseleni birlesip sheshýdiń jaqsy bastamasy bolyp tabylady», - dep atap ótti «Samruk-Kazyna Trust» qorynyń resmı ókili Lıma Dıas.
Lıma Dıastyń aıtýynsha, atalmysh jobanyń basty nátıjesi - balalardyń áleýmettik qoǵamǵa beıimdelýi bolmaq.
«Aldaǵy 5-10 jyldyń ishinde qazir osy mektepterde bilim alyp jatqan 15 myń búldirshin bolashaqta 15 myń eresek adam jáne biz olardyń qoǵamnyń tolyqqandy múshesi bolatynyna senemiz. Biraq buǵan orta bilim deńgeıinde ǵana nazar aýdarý kózdegen maqsatqa jetýge kómektespeıdi. Mektep bitirgennen keıin balalardyń orta-kásibı bilim jáne joǵary bilim alǵandary óte mańyzdy. Dese de, erekshe balalardy barlyq kolledjder men ýnıversıtetter qabyldaýǵa daıyn emes. Bul joba bilim berý júıesidegi aýqymdy ózgeristerge negiz bolyp tabylady jáne biz bilimimizdi, tájirıbemiz ben kúsh-jigerimizdi biriktirý arqyly balalarǵa jaqsy ómir qamtamasyz ete alamyz degen úmittemiz»,- dedi Lıma Dıas.
Búgingi tańda Qazaqstanda 100 túzetý mektebinen bólek 39 arnaıy mektepke deıingi bilim berý uıymy, 13 ońaltý ortalyǵy, 173 psıhologııalyq-pedagogıkalyq túzetý kabınetteri jáne 68 psıhologııalyq-medıtsınalyq-pedagogıkalyq keńes bar.
«Samruk-Kazyna Trust» qorynyń kórsetken kómegi ushan- teńiz. Bul quraldar bilim alýshylardyń oqý úrdisinde sóıleý jáne qımyl-qozǵalys buzylýshylyǵyn túzetip, este saqtaý qabiletin, zeıinin jáne sensorly motorıkasyn damytýǵa kómektesedi. Buǵan deıni «Samruk-Kazyna Trust» qory mektepke deıingi balalarǵa arnalǵan taktıldi oqýlyqtardy daıyndaý boıynsha jobany júzege asyrdy. Bul oqýlyqtar 250 dana kóleminde barlyq arnaıy balabaqshalarǵa jetkizildi», - dedi QR Bilim jáne ǵylym mınıstrliginiń Mektepke deıingi jáne orta bilim departamenti dırektorynyń orynbasary Zeınep Mahsutova.
