Qazaqstanda tuz óndirý 12% ósti
ASTANA. QazAqparat - Halyqtyń tuzǵa qajettiliginiń 90%-yn qamtamasyz etý úshin Qazaqstanda óndirilip jatqan tuzdyń úshten biri jetkilikti, al qalǵany eksportqa shyǵarylady, dep habarlaıdy QazAqparat energyprom.kz-ke silteme jasap.
2018 jyldyń qańtarynan qyrkúıegine deıin Qazaqstanda 173,1 myń tonna tuz óndirildi. Bul byltyrǵy kórsetkishten 11,7% artyq.
Tuz óndirisiniń 98,8%-y (úsh toqsanda 170,9 myń tonna) Qyzylorda oblysynyń úlesine týra keledi. Elimizdiń tuz alyby «Araltuz» AQ ta osynda ornalasqan.
Eske sala keteıik, Qyzylorda oblystyq ındýstrıaldy-ınnovatsııalyq damý basqarmasynyń aqparatyna sáıkes, ındýstrııalandyrý baǵdarlamasy aıasynda «Araltuz» kásipornynda ıspan tehnologııasy negizinde tuz óndiretin eki tseh iske qosylǵan bolatyn. Bul eńbek ónimdiligin eki ese arttyryp, 1200 adamdy jumyspen qamtýǵa jaǵdaı jasady.
Qazaqstanda tuz az mólsherde ımporttalady. Otandyq ónerkásip 2018 jyldyń qańtar-qyrkúıek aılarynda suranystyń 90%-dan astamyn qamtamasyz etken.
Budan tys, qazaqstandyq kompanııalar tuz eksportyn jyl saıyn 22,8%, 114,3 myń tonnaǵa deıin arttyryp keledi.
Qyzylorda oblystyq ındýstrıaldy-ınnovatsııalyq damý basqarmasynyń bastyǵy Rınat Sultangereevtiń aıtýynsha, «Araltuz» AQ qazaqstandyqtardyń suranystaryn qamtýmen qatar, Reseı tuz naryǵynyń 12%-yna ıelik etip otyr. Budan tys, byltyr Ázerbaıjanǵa eksporttaý bastaldy, aldaǵy ýaqytta ónimdi Qytaıǵa shyǵarý jaıy qarastyrylyp jatyr.
Elimizdegi tuzdyń baǵasynda da turaqtylyq baıqalady. 2018 jyldyń qazanynda tuz baǵasy byltyrǵymen salystyrǵanda nebári 1,8% ósken.
Eń qymbat tuz Astana (kılogramyna 59 tg) jáne Almaty (57) qalalarynda satylady. Baǵanyń ósýi Qostanaıda aıtarlyqtaı baıqalǵan (jylyna +7,7%). Qazir ondaǵy tuzdyń kılogramy 56 teńge jetken. Al Oralda, kerisinshe, tuz 7% arzandap, 43 teńge bolyp otyr.
Aqtaý, Aqtóbe, Taldyqorǵanda tuz baǵasy byltyrdan beri ózgermegen.
