Qazaqstanda túınemege qarsy qandaı sharalar qolǵa alyndy

QR Densaýlyq saqtaý mınıstrligi elimizde túınemege qarsy qabyldanyp jatqan sharalar týraly aıtyp berdi, dep habarlaıdy Kazinform. 

«QR Densaýlyq saqtaý mınıstrligi sanıtarııalyq-epıdemıologııalyq baqylaý komıtetiniń aýmaqtyq bólimsheleri halyqtyń túıneme aýrýynyń aldyn alý jáne jol bermeý maqsatynda túınemeniń epıdemııalyq oshaqtaryn anyqtaý, tirkeý jáne esepke alý jumystaryn júrgizýde. Oǵan qosa, túıneme oshaqtarynyń aınalasyndaǵy sanıtarııalyq-qorǵaý aımaǵyndaǵy jer ýchaskelerin paıdalanýǵa jol berilmeıdi», - dep jaýap berdi mınıstrlik Kazinform agenttiginiń saýalyna.

Odan bólek, mınıstrlik adamdardyń túıneme aýrýlary tirkelgen oshaqtarda epıdemııaǵa qarsy is-sharalardyń oryndalýyn, profılaktıkalyq vaktsınalaýdy baqylaıdy jáne adam aýrýy tirkelgen oshaqtarda profılaktıkalyq, josparly jáne qorytyndy dezınfektsııa júrgizedi. Halyqpen jáne mal shıkizatyn ázirleý, jınaý, saqtaý, tasymaldaý, óńdeý jáne satýmen kásibı aınalysatyn adamdar arasynda sanıtarlyq-aǵartý jumystaryn júrgizedi.

Adamdardyń túıneme aýrýy jaǵdaılaryn tirkeýde densaýlyq saqtaý uıymdary:

- naýqastardy anyqtaý, dıagnostıkalaý jáne aýrýhanaǵa jatqyzý, úı-jaılardy (páterlerdi) aralaý;

- sońǵy naýqas anyqtalǵan sátten bastap terini kúndelikti tekserý, 14 kún boıy naýqaspen baılanysta bolǵandardy medıtsınalyq baqylaý;

- ınfektsıonıst dárigerdiń taǵaıyndaýymen shuǵyl profılaktıka jasaý;

- halyqpen aqparattyq-túsindirý jumystaryn júrgizýmen aınalysady.

Eske sala ketsek, Qaraǵandy oblysynyń Topar kentinde úsh adamnan túıneme (sibir jarasy) anyqtalǵan edi.