Qazaqstanda tutynýshylyq nesıe alǵan adamdardyń 60 paıyzdan astamy jasyrynyp júr

ASTANA. QazAqparat - Qazaqstanda tutynýshylyq nesıe alǵan 662 myń adam qaryzyn tóleý merzimin keshiktirip otyr. Bul týraly búgin Májiliste «Kollektorlyq qyzmet týraly» QR Zań jobasyn talqylaýǵa arnalǵan «dóńgelek ústelde» QR Ulttyq banki tóraǵasynyń orynbasary Oleg Smolıakov málim etti.

«Biz barshamyz ótken jyldarda jeke adamdardy nesıelendirý deńgeıiniń óskenin baıqadyq. 2013 jyly qamtamasyz etilmegen tutynýshylyq nesıelendirý eki esege jýyq artty. Osy rette halyq tabysynyń ósimi bazasynda tutynýshylyq suranystyń artýyna baılanysty ońtaıly tustary da boldy, alaıda bul baǵytta qazirgi kezde bankterdiń aldynda qaryzy bar jeke adamdardyń sany 5 mıllıonnan asyp ketti. Tólem merzimin keshiktirý kórsetkishine toqtalatyn bolsaq, ıaǵnı nesıesin jappaǵanyna 90 kúnnen asyp ketken adamdardyń sany 1 mıllıonnan astam. Ulttyq bank bundaı nesıelerdi «jumys istemeı turǵan qaryzdar» dep ataıdy», - dep toqtaldy O. Smolıakov.

Belgili bolǵandaı, búginde elimizde ıpotekalyq nesıeleýdiń úlesinde jalpy bereshektiń 28 paıyzǵa jýyǵy tıesili kórinedi.

Sonymen qatar ol tutynýshylyq nesıeleý máselesine toqtala kele, jeke tulǵalardy nesıleýdiń jalpy kóleminde onyń kólemi 49 paıyzǵa jýyq deńgeıdi qamtyp otyrǵandyǵyn jetkizdi. Osy oraıda 90 kúnnen astam tóleý merzimin keshiktirip alǵandar 662 myń adamdy qurap otyr. ıAǵnı, 90 kúnnen astam keshiktergen tutynýshylyq qaryzdyń jumys istemeı otyrǵan naryǵynyń kólemi 272 mlrd. teńgege jýyqtady. Osy qaryzdarǵa qatysty saýyqtyrý rásimderin júrgizý qajet etedi.

«Qaryz alýshyǵa qatysty boryshkerlik salmaqtyń artqany baıqalady, al ekinshi jaǵynan alyp qaraǵanda, atalǵan qaryz alýshylardyń tólem jasaýǵa beıimdiligi de tómendep keledi. Júrgizilgen taldaýǵa sáıkes, boryshkerlerdiń tek tórtten biri qaryzyn ózderine qatysty emes, ıaǵnı obektıvti sebepter men jaǵdaılarǵa baılanysty óteı almaı otyr. Mundaı jaǵdaılarǵa asyraýshysynan aıyrylý, naqty tabystyń tómendeýi, aýrýǵa shaldyǵý sebep bolady. Degenmen de, bizdiń esepteýler boıynsha qaryz alýshylardyń basym bóligi, ıaǵnı olardyń 64 paıyzy jaı ǵana jasyrynyp júr. Olar jalǵan baılanys málimetterin kórsetip, turǵylyqty jerlerin ózgertip, nesıe berýshisine aqparattardy bermeıdi», - dedi UB ókili.

Onyń sózine qaraǵanda, qaryz alǵandardyń 13 paıyzǵa jýyǵy nesıe alý kezinde alaıaqtyq tásilderdi paıdalanǵan nemese jalǵan tabys kózderin kórsetken.