Qazaqstanda tutynýshylarmen Keden odaǵy tehreglamentteri jobalaryn ázirleý boıynsha óńirlik shtab qurylmaq
ASTANA. 25 jeltoqsan. QazAqparat - Tutynýshylarmen Keden odaǵy tehnıkalyq reglamentteri jobalaryn ázirleý ári beıimdeý boıynsha óńirlik shtab qurylmaq. Bul týraly búgin QR Úkimet basshysy Serik Ahmetovtyń tóraǵalyǵymen ótken tehnıkalyq retteý jáne metrologııa júıesin damytý sharalaryna arnalǵan keńeste QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń tóraǵasy Birjan Qanyshev málim etti.
«Keden odaǵy aıasynda biryńǵaı qazaqstandyq ustanymdy qalyptastyrý maqsatynda tutynýshylarmen Keden odaǵy tehnıkalyq reglamentteri jobalaryn ázirleý ári beıimdeý boıynsha óńirlik shtabyn qurýdy jáne salalyq organdarda eksperttik keńesterdi jańartýdy usynamyz», - dedi ol.
Komıtet tóraǵasynyń atap ótýinshe, atalǵan tehnıkalyq reglamentter kelissózder barysynda Qazaqstan múddesin qorǵaıtyn delegatsııanyń qolyna túspes buryn tórt márte saraptamalyq keńestiń qaraýynan ótedi.
Osy oraıda QR Premer-Mınıstr Serik Ahmetov bul máselege zor jaýapkershilikpen qaraýdy talap etti. Sonymen qatar ol qazirgi ýaqytta memlekettik organdardyń janyndaǵy saraptamalyq keńesterdiń jumysy turaqsyz ekendigin de basa aıtty. «Erinbegenniń bári de oǵan qatysady. Búgin bireýi, erteń basqasy. Sondyqtan ustanym joǵalady. Osydan bizdegi barlyq problemalar týyndap otyr ári kelisószder protsesi túsiniksiz júrýde. Qazir biz bólingen resýrstar aıasynda jańa shtabtardyń shtattyq sanyn aıqyndaıtyn bolamyz. Olar turaqty jáne jedel bolýy tıis», - dedi S.Ahmetov.
