Qazaqstanda tutynýshylardyń quqyqtary qaı salada kóp buzylady
ASTANA. QazAqparat - Bul másele elimizdiń tutynýshylardyń quqyqtaryn qorǵaý komıtetiniń tapsyrysy boıynsha arnaıy júrgizilgen zertteýlerdiń barysynda málim boldy, dep habarlaıdy kzpp.gov.kz saıty.
Zertteý sharasyna Qazaqstannyń 14 oblysynan, Astana jáne Almaty qalalarynan 2500 respondent qatysqan. Zertteý nátıjeleri kórsetkendeı, Qazaqstan boıynsha tutynýshylardyń quqyqtary negizinen qyzmet kórsetý salasynda buzylady (76 paıyz).
Mundaı jaǵdaı kóbine Mańǵystaý oblysynda baıqaldy (85 paıyz). Al eń az jaǵdaı Qostanaı oblysynda (69 paıyz). Qazaqstan boıynsha sapasyz taýarlardy tutyný jaǵdaılary kóbine Soltústik Qazaqstan oblysynda (74 paıyz), eń az Pavlodar oblysynda (59 paıyz) kezdesedi.
Jıi quqyq buzýshylyqtar baǵa men chektegi somanyń sáıkes kelmeýimen (34 paıyz), satyp alýshylarǵa qosymsha taýarlardy tyqpalaýmen (29 paıyz), qyzmet kórsetýshilerdiń dórekiligimen (25 paıyz) jáne taýar nemese qyzmet sapasynyń aıtylǵan deıgeıge saı kelmeýimen (24 paıyz) baılanysty bolyp keledi.
Tutynýshylar qandaı da bir zatty satyp alarda taýarlardyń jaramdylyq merzimin ǵana tekserip, ondaǵy zııandy qospalarǵa qatysty málimetterge mán bermeıdi. Al satý oryndarynda ilingen tutynýshylardyń quqyqtaryn qorǵaý týraly aqparatty adamdardyń kópshiligi múldem oqymaıtyndyǵyn aıta ketý qajet.
Zertteýge qatysqan respondentterdiń kóbi tutynýshylyq quqyǵy buzylǵan kezde óz quqyqtaryn qorǵamaıdy, ıaǵnı quzyrly organdarǵa shaǵym túsirmeıdi. Tutynýshylardyń óz quqyqtaryn qorǵaý-qorǵamaýy taýar qunyna baılanysty bolyp shyqty. Eger ol mol kólemde bolsa, azamattar sotqa barýǵa daıyn. Al eger olaı bolmasa eshkim de quqyq máselesin nazarǵa almaıdy.
