Qazaqstanda tutynýshylar quqyǵynyń qorǵalýyna baılanysty jyldyq esep ázirlenetin bolady
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasynyń negizgi maqsaty tutynýshylar quqyǵyn qorǵaý salasyn retteý qaǵıdattaryn aıqyndaý, tutynýshylar quqyǵyn qorǵaýǵa baǵyttalǵan jańa tetikterdi engizý men qoldanystaǵy mehanızmderdi jetildirý bolyp tabylady.
«Zań jobasymen tutynýshylardyń taýardyń kemshiligine qatysty talaptar qoıý merzimi belgilenedi. Taýardyń kemshilikterin joıý, tıisti sapasy joq taýarlardy aýystyrý merzimderi naqtylanady. Budan bólek, jumystardy oryndaý, qyzmetter kórsetý jaǵdaılary naqtylanady, onyń ishinde oryndaýshynyń qasaqana jasyrǵan kemshilikterin anyqtaý maqsatynda talaptar qoıý, shaǵymdar jasaý merzimi ulǵaıtylady», - dedi Ulttyq ekonomıka mınıstri Erbolat Dosaev.
Onyń aıtýynsha, zań jobasymen tutynýshylar qoǵamdyq birlestikteriniń ókilettigin nyǵaıtý sharalary qarastyrylyp otyr. Bul rette tıisti memlekettik organdarǵa qaýipsizdik pen sapa talaptaryna sáıkespeıtin taýarlardy shyǵaryp, jumystardy, qyzmet kórsetýlerdi júzege asyrǵan kináli tulǵalarǵa qatysty sharalar qoldaný týraly aqparattar joldanatyn bolady. Tutynýshylardyń qoǵamdyq birlestikterine tutynýshylar múddeleri úshin talap-aryzdar berý quqyǵyn júkteý de usynylyp otyr.
«Budan bólek, tutynýshylar quqyǵyn qorǵaý jónindegi memlekettik organdardyń rólin kúsheıtý qaralyp otyr. Tutynýshylardyń shaǵymdaryna jartyjyldyq, jyldyq taldaýlar júrgiziletin bolady. Soǵan oraı Úkimetke, odan ári QR Prezıdentine joldanatyn Qazaqstandaǵy tutynýshylar quqyǵy qorǵalýyna baılanysty jyldyq esep ázirlenetin bolady», - dedi E. Dosaev.
