Qazaqstanda tutyný nesıesin berý erejeleri kúsheıedi

ASTANA. KAZINFORM — Mıkrokredıt boıynsha bir kúndik keshiktirimniń ózi kepilsiz nesıe alýǵa kedergi bolady, al keıbir qaryz alýshylar úshin aı saıynǵy tólem mólsheri tabystyń tórtten birinen aspaýy tıis, dep habarlaıdy Kazinform agenttiginiń tilshisi.

Qarjy naryǵyn retteý jáne damytý agenttigi qaryz berý talaptaryn qatańdatatyn qaýly jobasyn qoǵamdyq talqylaýǵa shyǵardy. Qujat ekinshi deńgeıli bankter men Qazaqstanda jumys isteıtin sheteldik bankterdiń fılıaldaryna qatysty.

Qandaı ózgerister usynylyp otyr:

• Qaryz júktemesiniń koeffıtsıentin (QJK) 0,25 deńgeıimen shekteý. Bul talap sońǵy 12 aıda 90 kúnnen astam merzimge keshiktirilgen nesıesi bolǵan qaryz alýshylarǵa qatysty. ıAǵnı, bank jańa qaryzdy tek aı saıynǵy tólem mólsheri qaryz alýshynyń tabysynyń 25%-ynan aspaıtyn jaǵdaıda ǵana bere alady.

• Kepilsiz tutynýshylyq nesıe berýge tyıym salý, eger qaryz alýshyda kelesi jaǵdaılar bar bolsa:

  • bank nesıeleri boıynsha tólem merzimin 30 kúnnen astam keshiktirý;

  • mıkrokredıt boıynsha keminde 1 kún keshiktirý;

  • sońǵy 3 jylda tolyq keshirilgen qaryz;

  • «tıimsiz qaıta qurylymdaý» – ıaǵnı, qaryz sharttary qaıta qaralǵannan keıin de qaıtadan keshiktirim paıda bolyp, bereshek somasy azaımaǵan jaǵdaı.

Agenttik bul jobanyń maqsaty – tutynýshylyq nesıelendirýdiń qarqynyn baıaýlatý jáne azamattardyń shamadan tys qaryzǵa batýyna jol bermeý ekenin túsindirdi.

Retteýshi organnyń aıtýynsha, bul talaptar tek buryn qaryz tóleýde qıyndyqqa tap bolǵan azamattarǵa ǵana áser etedi, al adal qaryz alýshylar úshin eshteńe ózgermeıdi.

Buǵan deıin bankter men mıkroqarjy uıymdarynda qazaqstandyqtardyń 800 myńnan astam problemalyq nesıesi bary habarlanǵan edi.

Aıta keteıik, Qazaqstanda nesıe alýdyń jańa erejesi engizildi.