Qazaqstanda sý sharýashylyǵy salasy tutas jańǵyrtylady

ASTANA. KAZINFORM – Sý resýrstary jáne ırrıgatsııa mınıstrligi búkil sý sharýashylyǵy salasyn transformatsııalap jatyr.

Mınıstrliktiń resmı ókili Móldir Ábdýálıevanyń aıtýynsha, jumys úsh negizgi baǵyt boıynsha júrgizilip jatyr.

«Birinshisi – jańa normatıvtik-quqyqtyq baza qurý. Atap aıtqanda, jańa Sý kodeksinde sý únemdeý saıasatyn qalyptastyrýǵa, sarqyn sýdy qaıta qoldanýǵa baǵyttalǵan sharalar kózdelgen», - dedi M.Ábdýálıeva Ortalyq kommýnıkatsııalar qyzmetinde.

Ekinshisi – sý sharýashylyǵy ınfraqurylymyn jańǵyrtý. Oǵan sáıkes, 20 sý qoımasyn salý josparlanýda. Olardyń beseýiniń qurylysy bıyl bastalady. Budan basqa, jumys istep turǵan 15 sý qoımasy qaıta jańartylady.

«Úshinshisi – irgeles memlekettermen yntymaqtastyqty kúsheıtý. Osylaısha, Qazaqstan Ózbekstanmen eki tarap tutynatyn sýdyń naqty kólemin esepteýge múmkindik beretin eseptegishterdi ornatý týraly kelisti. Mundaı kelissózder basqa kórshi eldermen de júrgizilmek. Bıyldan bastap Qazaqstan Halyqaralyq Araldy qutqarý qoryna tóraǵalyq etedi. Qazirgi ýaqytta Qyrǵyzstan, Tájikstan, Túrikmenstan jáne Ózbekstannyń qatysýymen «Ortalyq Azııa elderi arasynda sý-energetıkalyq yntymaqtastyq tetigin qurý týraly» kelisimniń jobasy ázirlenip jatyr. Qytaımen 20-dan astam ózen boıynsha kelissózder júrgizilýde. Olardyń ishinde úsh iri transshekaralyq ózen bar: Ertis, Іle jáne Elek», - dedi Móldir Ábdýálıeva.