Qazaqstanda túsiniksiz baılyqqa talap engizilmek
ASTANA. KAZINFORM – Álemde aktıvterdi qaıtarý úshin qoldanysqa engizilgen jańa modeldiń biri Qazaqstanda da júzege asyrylmaq. Bul jaıynda Jibek Joly telearnasynyń «Qaıtarylýy tıis» derekti fılminde Bas prokýratýra janyndaǵy Aktıvterdi qaıtarý komıtetiniń tóraǵasy Nurdáýlet Súıindikov aıtty.
Qazaqstan Prezıdenti Qasym-Jomart Toqaev zańsyz alynǵan aktıvterdi elge qaıtarý qajettigi jaıynda 2022 jyldyń aqpanynda ótken Úkimettiń keńeıtilgen otyrysynda aıtqan bolatyn. Bul bastamanyń maqsaty – bıznes ortada durys básekeni jáne eldegi jalpy ekonomıkalyq ahýaldy kúsheıtý.
2023 jyldyń shildesinde Memleket basshysy «Zańsyz alynǵan aktıvterdi memleketke qaıtarý týraly» Zańǵa qol qoıdy.
Fılmde Bas prokýratýra janyndaǵy Aktıvterdi qaıtarý komıtetiniń tóraǵasy Nurdáýlet Súıindikov búginde jumystyń qarqyndy júrgizilip jatqanyn aıtady. Qazirdiń ózinde naqty nátıje bar. Sóz 1,5 trln teńge somasyna qaıtarylǵan aktıvter jaıynda bolyp otyr. Sonymen qatar ol Aktıvterdi qaıtarý komıteti túsiniksiz baılyqqa qatysty alǵashqy talaptyń jáne sot sheshiminiń shyǵarylǵanyn atap ótedi.
«Álemde aktıvterdi qaıtarýdyń birneshe modeli bar. Sońǵysy jáne jańalarynyń biri túsiniksiz baılyqqa talap dep atalady. Bul memlekettiń belgili bir tulǵanyń qandaı da bir múlikti zańdy ıelenýine qatysty aqylǵa qonymdy narazylyǵyna baılanysty. Al sýbekt ony zańdy túrde alǵanyn dáleldeýi tıis. Eger ol ony dáleldeı almasa, onda bul múlikke sot sheshimimen túsiniksiz baılyq mártebesi beriledi jáne memleket kirisine qaıtarylady. Mine osyndaı talap negizinde sot sheshimi kúshine engen Qazaqstanda birinshi jaǵdaı bar. Soǵan oraı taıaý ýaqytta memleket kirisine shamamen 11 000 000 dollar qaıtarylady. Munan bólek, shamamen 1 mln dollarǵa múlik, onyń ishinde brend zattar bar», - dedi ol.
QR Prezıdenti Ákimshiliginiń basshysy Aıbek Dádebaıdyń atap ótýinshe, bul elimiz úshin teńdessiz tájirbıe sanalady. Atalǵan tájirıbe bedeldi halyqaralyq uıymdar men seriktes elder tarapynan da qoldaý taýyp otyr.
