Qazaqstanda túsirilgen úzdik fılmder qandaı
«Sháken Aımanov atyndaǵy «Qazaqfılm» kınostýdııasynda «Qazaqanımatsııa» shyǵarmashylyq birlestigi quryldy. Az ýaqyttyń ishinde memlekettiń qoldaýymen 20 anımatsııalyq joba jaryq kórdi», - dedi N. Dáýeshev mınıstrliktiń alqa májilisinde.
Onyń aıtýynsha, memleket tarapynan 50 kınojobaǵa qarjylyq qoldaý kórsetildi.
«Tuńǵysh ret memlekettik bıýdjetten qarajat bólý arqyly álemge áıgili «Disney» stýdııasynyń «Avatar», «Qara qabylan: Vakanda jasasyn!», «Avatar. Sý joly» fılmderi qazaq tiline aýdarylyp, kórermen nazaryna usynyldy. «Uly Dala tańy», «Dos-Muqasan», «Patrıottar ýaqyty», «Alǵa», «Shema», «Muqaǵalı», «1941 jyldyń jazy», «Soqyr mahabbat», «Hırýrg», «Ot», «Ómir», «Adam jáne alma» fılmderiniń premeralary jaryq kórdi. Álemniń 13 elinde Qazaqstannyń kıno kúnderi uıymdastyryldy», - dedi vıtse-mınıstr.
Onyń sózine qaraǵanda, Darejan Ómirbaevtyń «Aqyn» fılmi Tokıo halyqaralyq kınofestıvalinde «Úzdik rejısser», Brazılııadaǵy «Olhar de Cinema» kınofestıvalinde «Úzdik fılm» atandy, Farhat Sharıpovtyń «Shema» fılmi 72-shi Halyqaralyq Berlın kınofestıvalinde «Djenereıshn» baǵdarlamasynyń bas júldesin, Asqar Uzabaevtyń «Baqyt» áleýmettik dramasy Berlın kınofestıvaliniń «Panorama» baǵdarlamasynda «Kórermender kózaıymy syılyǵyna» ıe boldy.
«Ámir Baıǵazınniń «Ómir» fılmi «OSKAR» syılyǵynyń «Shet tilindegi úzdik fılm» nomınatsııasyna usynyldy», - dedi Nurǵısa Dáýeshov.
Budan buryn habarlanǵandaı, elimizdegi teatrlarda 300-den astam jańa týyndy kórermen nazaryna usynyldy.
